عامې روغتیا وزارت د کورونا ګواښ کمېدو او ددې وبا دخپرېدو مخنیوي پهموخه په ټول هېواد کې ښوونځي، پوهنتونونه او نور ښوونیز مرکزونه تر نامعلومې نېټې رخصت کړي دي.
اوس د پوهنې وزارت وایي که روغتیا وزارت د ښوونځیو رخصتي بیا ځلې تمدید نکړي، دوی کولای شي چې په دېرش ورځو کې له لاسه تللې زده کړې جبران کړي.
د پوهنې وزارت ویانده نجیبه ارین وایي: «ددې لپاره چې موږ حضوري زده کړې جبران کړو، بېلابېلې لارې ورته موجودې دي چې استفاده ترې وکړو؛ په افغانستان کې انټرنټ ته لاسرسۍ مشکل دی، ددې لپاره موږ تدریسي ویډیوګانې د وبسټایټ، پوهنې ټلویزون او په ولایتونو کې د محلي راډیوګانو له لوري خپروو.»
پوهنې وزارت وایي، د کورونا ګواښ په لوړېدو دی او تر اوسه د تړل شویو ښوونیزو مرکزونو د بیا پرانیستلو نېټه نه ده مشخص شوې، خو په وینا یې د لسم، یوولسم او دولسم ټولګیو زده کوونکي کولای شي په انلاین ډول خپلو زده کړو ته دوام ورکړي.
ارین وایي: «د رخصتیو تمدید د روغتیا وزارت د پرېکړې پر اساس کیږي، که چېرې تر یوې اوونۍ زده کړې پیل شي، موږ کوښښ کوو چې له لاسه وتلې حضوري زده کړې جبران کړو.»
د پوهنې وزارت د مالوماتو له مخې، له تېر کال راهیسې له ۶۰۰۰ ډېرې درسې ویډیو ګانې یې ثبت کړي، هغه زده کوونکي چې انټرنټ ته لاسرسۍ نلري د پوهنې وزارت له ویبسایټ، د پوهنې ټلویزون او په ولایتونو کې د محلي راډیوګانو له لارې یې تعقیبولای شي.
