د پوهنې وزارت چارواکو د سواد زده کړې پراختیا لپاره له ۲۴ وزارتونو او ادارو سره د همکاریو هوکړه لیکونه لاسلیک کړل.
د دې وزارت چارواکي وایي، دغه هوکړې به د سواد زده کړې کورسونو پراخولو او د زده کړې فرصتونو په زیاتولو کې مرسته وکړي.
دوی زياتوي، د دې هوکړه لیکونو له مخې به د يوې ځانګړې طرحې په وروستي کېدو سره د درېيو کلونو په موده کې په تدریجي توګه د هر ډول جواز اخیستونکو، کسب ګرو، نظاميانو، ملکي ادارو د ۷ او ۸ بستونو خدماتي کار کوونکو په ګډون یو ميليون تنو ته د سواد زده کړې په برخه کې خدمات وړاندې شي.
د پوهني وزارت چارواکي زیاتوي، د بودیجې له کسر سربېره یې د هېواد ټولو لرې پرتو سیمو ته د عصري او دیني زده کړو لړۍ غځولې ده.
د پوهني وزارت د ښوونې او روزنې معین سخاالله سعید وايي: « سره له دې چې امکانات کم دي، بودیجه هم د تېر په پرتله کمه ده او تشکیل د تېر په پرتله زیات شوی، خو له دې سربېره هم ټوله بودیجه یې ورته پوره کړې ده.»
د پوهني وزارت د سواد زده کړې آمر زاهد الله وايي: « د دې سند له نهايي کېدو وروسته به د درېیو کالو په موده کې په تدریجي توګه د یو میلیون هر ډول جواز اخیستونکو، کسب ګرو، د نظامي پرسونل او د ملکي ادارو د اووم او اتم بستونو خدماتي کارکوونکو لپاره به د سواد زده کړې په برخه کې تعلیمي خدمات وړاندې شي.»
د پوهني او دغه راز د کور او ښار جوړولو وزارت چارواکي په دې ناسته کې د پرمختک او پر ځان بسیایني لپاره زده کړې یوه جدي اړتیا بولي او ډاډ ورکوي چې سرپرست حکومت هڅه کوي په ټول هېواد کې د عصري او دیني زده کړو لپاره زمینه برابره کړي.
دغه چارواکي وایي، پوهني وزارت دې له سیاست لرې وساتل شي.
د پوهنې وزارت د کیفیت د تضمین معین عبدالخالق صادق وايي: « که زما او ستا ټولنه بهبود او ارتقا پیدا کوي، که زه او ته او زموږ هېواد غني کېږو، که ما او تا او دغه هېواد د بل له احتیاج څخه خلاصوي، نو دا شی یوازې قلم دی، نه کوم بل شی.»
د کور او ښار جوړلو وزارت معین مراد علي کریمي بامیاني وايي: « حضرت رسول الله(ص) فرمایلي، علم پر هر ښځینه او نارینه مسلمان فرض دی.»
همدارنګه د ملي دفاع وزارت مسوولین وایي، د پوهنې بهیر پیاوړتیا د اسلامي امارت په کاري لومړیتوبونو کې ده او زیاتوي، اوس په هېواد کې د جګړې وخت پای ته رسېدلی او اړتیا ده چې ټول د هېواد د بیارغونې او پرمختګ لپاره هڅه وکړو.
د ملي دفاع وزارت عقیدتي رییس سید اغا ابو مقبول وايي: « په هره برخه کې د معلوماتي ټکنالوژۍ کارول پوهې ته اړتیا لري. که تاسو دا نږدې عربي هېوادونو ته ورشئ، د هغوی ټوله ټکنالوژي او د چارو مدیریت د هغه چا په لاس کې دی چې پوهه لري.»
د عامي روغتیا وزارت مالي او ادارې معین بخت الرحمن شرافت وايي: « علم رڼا ده، ناپوهي او د علم نه لرل جهالت او تیاره ده. موږ دا مهال د سواد زده کړې په برخه کې تر ۳۰ زرو زده کوونکي لرو.»
د لیک او لوست زده کړې مسوولینو په دې کنفرانس کې وویل، په ټول هېواد کې ۱ زر ۴۰۹ بابه د سواد زده کړې کورسونه ایجاد شوي دي.
د دوی په خبره، په دغو کورسونو کې شاوخوا ۲۹۰ زره ۴۲۷ تنو زده کوونکو ته د زده کړو زمینه برابره شوې او ۱۲۱ زره ۹۱۸ تنه یې له زده کړو فارغ شوي دي.
چارواکي دغه راز زیاتوي، د هېواد په ملکي او نظامي ادارو کې ټولټال ۴ زره ۷ بابه د سواد زده کړې کورسونه ایجاد شوي چې د ۲ زره ۷۸۸ تنو ښوونکو له لوري ۹۲ زره ۱۲۰ تنو نالوستو نظاميانو او خدماتي پرسونل ته د سواد زده کړې زمینه برابره شوې ده.
