پوهنې وزارت د سمیع الله په نوم هغه کوچني ماشوم لپاره ستاینغونډه جوړه کړې چې له خيبرپښتونخوا تازه راستون شوی او په ریاضي کې ځانګړی استعداد لري.
په غونډه کې د پوهنې وزارت چارواکو وویل، افغانستان نه یوازې ديني عالمانو بلکې په عصري علومو کې هم پياوړو متخصصو ظرفيتونو ته اړتیا لري او خلک دې په دې برخه کې زیاته هڅه وکړي.
د پوهنې وزارت سلاکارغوښتنه کوي چې خلک دې په خپلو اړوندو مسلکونو زیاته توجه وکړي او موخه یې هم باید د الله رضا او هېواد خدمت وي.
د پوهنې وزارت سلاکار سید غیاث الدین اغا وايي: « دا وطن یوازې په یوه عالم نه آبادېږي، تنها په یوه مفتي او قاضي نه آبادېږي بلکې دا وطن لکه څرنګه چې مفتي، قاضي او دیني عالم ته اړتیا لري، انجینر، ډاکټر، ډېپلوماټ او نورو کسانو ته هم ضرورت لري. دا وطن هر ډول استعداد او اشخاصو ته ضرورت لري.»
چارواکي وايي، پوهنې وزارت دې ته ژمن دی چې د خپلو ځوانو استعدادونو ښه پالنه وکړي او د رشد لپاره یې د لا زیات تعلیم زمینه برابره کړي.
د پوهنې وزارت د ارزونې رییس عبدالولي سعادت وايي: « د پوهنې وزارت استعدادونو ته ژمن او د استعدادونو او قابلیتونو د روزنې لپاره تر خپلې وسې هڅه کوي.»
په ورته مهال، ریاضي کې د ځانګړي مهارت لرونکي ماشوم سميع الله پلار وايي، زوی یې نه یوازې په جمع بلکې د تفریق، تقسیم او ضرب په عملیو کې هم ځانګړي مهارتونه لري او هیله یې وښوده چې د سرپرست حکومت له لوري لا زیاته پاملرنه ورته وشي.
د سميع الله پلار عبدالقیوم وايي: « سمیع الله د ریاضي په څلور واړه عملیو کې تکړه دی.»
په همدې حال کې د پوهنې وزارت له لوري سميع الله ته چې د ریاضي په ابتدايي برخه کې ځانګړی مهارت لري، د یوه کمیپوټر ترڅنګ۵۰ زره افغانیو نغدي جایزه او یو ستاینلیک ورکړل شو.
