پولنډي ځواکونو د سرحدي عملیاتو پر مهال د افغانانو په ګډون ۷۱ کډوال نیولي دي.
د پولنډ سرحدي ځواکونو ویلي، د لېتوانیا او بېلاروس له پولو سره یې په درې ورځنیو عملیاتو کې۷۱ کډوال چې یو شمېر افغانان دي، نیولي دي.
د پولنډ سرحدي ځواکونو ادارې په خپره کړې خبرپاڼه کې دغه راز ویلي، یاد کسان د پولنډ، لېتوانیا او بېلاروس پر سرحدونو پېژندل شوي او ترنیول کېدو وروسته، د قانوني پړاوونو له بشپړېدو سره سم، د لېتوانیا چارواکو ته سپارل شوي دي.
په خبرپاڼه کې زیاته شوې: «موږ د خپلو درې ورځنیو عملیاتو په لړ کې چې د لېتوانیا او بېلاروس له پولو سره نږدې مو ترسره کړل، ۷۱ غیرقانوني کډوال نیولي دي. په دې کډوالو کې یو شمېر افغان کډوال هم شته چې زموږ عملیاتو پر مهال نیول شوي.»
د خبرپاڼې له مخې، پولنډي ځواکونو یو اوکراینی وګړی هم نیولی چې د دې ادارې په وینا، د پنځو کډوالو د لېږد لپاره سرحدي سیمې ته تللی و او د عملیاتو پر مهال ونیول شو.
د پولنډ سرحدي ساتونکو ویلي، نیول شوي کډوال د دواړو هېوادونو ترمنځ د همکاریو د مکانېزم له مخې د قانوني پروسې تر بشپړېدو وروسته، د لېتوانیا اړوندو ادارو ته سپارل شوي.
د کډوالو د حقونو فعالان بیا پر ملګرو ملتونو او نړیوالې ټولنې غږ کوي چې د افغان کډوالو ژوند او حقوقو په برخه کې جدي ګامونه پورته کړي.
د کډوالو حقونو فعال ګلا خان بهادري وايي: « له هغه وروسته چې نړۍ کې د افغان کډوالو د نیولو پېښې زیاتې شوې دي، اړتیا ده چې نړیواله ټولنه او کوربه هېوادونه د نړیوالو قوانینو او بشري حقونو له مخې ورسره چلن وکړي. هېڅ افغان کډوال باید له قانوني ارزونې پرته ونه نیول شي، ونه شړل شي او هم داسې ځای ته وا نه ستول شوي چې ژوند یې له خطر سره مخ شي. دا د ملګرو ملتونو او کډوالو عالي کمېشنرۍ مسوولیت دی چې د افغان کډوالو د حقونو ساتنه وکړي.»
د کډوالو حقونو فعال عبدالرازق عدیل وايي: « له افغان کډوالو سره چلن باید له د یوه امنیتي برخورد په ځای د بشري حقونو تګلارې ته بدل شي. که څه هم د پولنډ دولت او نور اروپايي هېوادونه حق لري چې د خپلو پولو ساتنې لپاره د پولو مدیریت سخت کړي، خو دغه کار نه باید د انساني کرامت او نړیوالو قوانینو تر پښو لاندې کولو په بیه وي.»
په دې وروستیو څو کلونو کې ګڼ شمېر افغانان هڅه کوې چې د بېلاروس او لېتوانیا له لارې د اروپايي ټولنې غړیو هېوادونو ته ځان ورسوي.
د بېلاروس او پولنډ پوله له ۲۰۲۱ زېږدیز کال راهیسې اروپايي ټولنې ته د کډوالو د ننوتلو له مهمو لارو څخه ګڼل کېږي.
پولنډ په وروستیو کلونو کې د ناقانونه کډوالۍ د مخنیوي لپاره په دې سیمه کې امنیتي تدابیر سخت کړي او پر سرحدونو یې لا زیات محدودیتونه لګولي دي.
