واک ته د سرپرست حکومت د رسېدو په لومړيو کې روسیه د افغانستان د یوه نږدې متحد په توګه مطرح شوه، خو په وروستيو کې يې د دريځ له بدلولو سره په عامه اذهانو کې دغه باور تر ډېره راکم شو.
د روسیې ولسمشر له افغانستانه منځنۍ آسيا هېوادونو ته د ګواښونو پېښېدو اټکل کړی او وايي، د يادو ګواښونو پر وړاندې به بې پروا پاتې نه شي.
ولاديمير پوتین د تاجیکستان له ولسمشر اما علي رحمان سره ګډ خبري کنفرانس کې ټينګار کړی چې د منځۍ آسيا هېوادونو پر وړاندې د ورته احتمالي ګواښونو مخنيوي لپاره به له تاجیکستان سره په شريکه هڅې وکړي.
پوتین زیاته کړې: « موږ په منځنۍ آسیا کې د امنیتي مسایلو په اړه بحث وکړ. په دې برخه کې یو شمېر ننګونې او ګواښونه له افغانستانه رامنځته کېږي. روسیه به د اسانتیاوو په چمتو کولو سره په سیمه کې امنیت او ثبات ته کار وکړي. ۲۰۱ پوځي اډه په تاجیکستان کې موجوده ده، موږ له تاجیکستان سره د ترهګرۍ او نشه توکو پر ضد د پوځي ملاتړ همکاري زیاتوو.»
دا په داسې حال کې ده چې د افغانستان سرپرست حکومت ډاډ ورکوي چې له خاورې به يې هېڅ هېواد ته خطر پېښ نه شي او د دې ترڅنګ د منځنۍ آسيا له هېوادونو سره د ښو اړيکو لرلو ته لېوالتیا لري.
د اسلامي امارت مرستیال ویاند حمدالله فطرت وايي: « له افغانستانه هېڅ یوه هېواد ته امنیتي خطر او تهدید متوجه نه دی. موږ په کراتو ویلي او بیا هم ټینګار کوو چې افغانستان له ټولو ګاونډیو هېوادونو او په ځانګړې توګه له شمالي ګاونډیانو سره ښې اړیکې غواړي او دا یې ثابته کړې هم ده. د افغانستان ټوله جغرافیه د اسلامي امارت ځواکونو تر کنټرول لاندې ده، هېڅ هېواد ته له افغانستانه د تهدید او خطر احتمال نه لیدل کېږي؛ په دې اړه اندېښنې بې ځایه دي.»
له بلې خوا، د سیاسي چارو کارپوهان د ولسمشر پوتين دغه اټکل ته په غبرګون کې وايي، سرپرست حکومت په تېرو کالو کې د امنيت ټينګولو په برخه کې ځان ثابت کړی او په خبره يې که د ترهګرۍ پر وړاندې په سيمه ييزه کچه هڅې کېږي، نو افغانستان يې هم بايد برخه وي.
د سیاسي چارو کارپوه ادریس محمدي ځاځی وايي: « د دې پر ځای چې ګاونډیان د یو بل بدنامولو، کمزوري کولو او ګواښلو لپاره کار وکړي، اړتیا ده چې ټول ګاونډیان پر ګډه له ترهګرۍ سره شریکه مبارزه وکړي، ترڅو د دې پدیدې جرړې وچې شي.»
ځينې نور بیا وايي، د افغانستان او ګاونډیو هېوادونو ترمنځ د اړیکو ښه کېدو لپاره اړتیا ده چې د دواړو هېوادونو د چارواکو ترمنځ لیدنې ډېرې شي او په خبره یې، سرپرست حکومت دې هم د دايمي ثبات لپاره د خلکو او نړۍ مشروع غوښتنې ومني.
د پوځي چارو کارپوه اسدالله ندیم وايي: « د منځنۍ آسیا له حکومتونو سره دا اندېښنه شته، خو په مستقیمه توګه له طالبانو انتقاد نه شي کولی؛ ځکه چې تعامل ته اړتیا لري. نو د دې لپاره ترهګرې شبکې بهانه کوي، خو په اصل کې خپله د طالبانو لیدلوری د هغوی لپاره ستره ننګونه ده.»
که څه هم په تېرو درې نیمو کالو کې له ځينو هېوادونو سره د اسلامي امارت اړیکې پراخې شوې دي، خو تر اوسه د هېڅ هېواد له لوري پر رسمیت نه دی پېژندل شوی.
د اسلامي امارت ویاند ذبیح الله مجاهد له دې وړاندې له شمشاد سره مرکه کې ویلي و چې له روسیې سره د افغانستان اړیکې دا مهال ښې دي او په خبره یې، ډېری هېوادونو ته قناعت ورکړل شوی چې افغانستان اوس یو امن ځای دی.
