پوتزل: د ښځو پر کار بندیز پرېکړه میلیونونه افغانان زیانمنوي

د ملګرو ملتونو د مرستندویه ماموریت یا یوناما مرستیال مارکوس پوټزل د رییس الوزرا له اداري مرستیال عبدالسلام حنفي سره په کتنه کې په غیردولتي موسسو کې د ښځو د کار پر بندیز او نورو مهمو مسایلو خبرې وکړې.

یوناما په یوه ټویټ کاږلي، په نادولتي موسسو کې د ښځو پر کار بندیز او له تعلیم او تحصیل څخه د نجونو او ښځو منعه کول په افغانستان کې میلیونونو کسانو ته زیان اړوي.

یوناما زیاتوي، د اسلامي امارت وروستۍ پرېکړې د ښځو او ماشومانو په ګډون ګڼو افغانانو ته د حیاتي مرستو د رسولو مخه نیسي.

اخوا بیا، عبدالسلام حنفي په افغانستان کې د ملګرو ملتونو د مرستندویه ماموريت يا يوناما سرپرست مارکس پوتزل سره په لیدنه کې ويلي، رامنځته شوې ستونزې باید د تفاهم له لارې حل شي او له افغانستان سره د نړیوالو مرستو د پرې کېدو احتمال تر ډېره خلکو ته زیان رسوي، چې باید ډډه ترې وشي

اسلامي امارت له لوري د نجونو پر مخ د پوهنتونونو دروازو تړلو او په غیر دولتي موسسو کې د ښځو پر کار د بندیز پرېکړو په کور دننه او نړیواله کچه پراخ غبرګونونه راپارولي او د دغه پرېکړو د بېرته اخیستو غوښتنه شوې ده.