په کندهار کې د نیالګیو کېنولو کمپاین پيل شو 

د کندهار ښار او لسوالیو کې د سه شنبې پر ورځ د « ۱۴۰۰ کال کب پر ۲۴ مه» د نیالګیو کېنولو کمپاین پیل شو.

ټاکل شوې ده،چې دغه پسرلني کمپاین کې به نژدې ۳۰زره زینتي او مېوه لرونکي نیالګي کېښودل شي.

د کمپاين د پیل پر مهال د کندهار والي مولوي محمد یوسف وفا له ښاریانو غوښتنه وکړه، چې د کېنول شویو نیالګیو په روزنه او پالنه کې  دې خپل مسوولیت نه هېروي.

وفا زیاته کړه:« د نیالګیو کېنولو او پاللو مسوولیت د ښاریانو او حکومت دواړو دی. موږ باید د ښار د سمسورتیا په خاطر دغه ګډ مسوولیت په ښه ډول تر سره کړو.»

بل پلو د کندهار ښارول نعمت الله حسن  وايي، د یادو نیالګیو له ډلې یې ۲۱زره ښاروالۍ او پاتې نور یې د کندهار د ملي سوداګرو او نورو شتمنو کسانو په مالي لګښت اخېستل شوي دي.

د کندهار ښاروال نعمت الله حسن وايي:« موږ به د کندهار ښار په ټولو ناحيو،عمومي جادو او پارکونو کې سږ کال ۲۲ زره نيالګي کېنولو، ترڅنګ به يې ۴ زره نور د ښار اوسيدونکي او سوداګر کېنوي. زموږ هدف د ښار سمسورتيا ده.»

بل خوا بیا عام خلک پر دولت نيوکه کوي،چې هرکال د ښار په ناحيو کې په زرګونه نيالګي کېنول کيږي، خو د نه پاملرنې له امله وچېږي.

دوی له  مسولينو غوښتنه وکړه،چې د نيالګيو روزنې او پالنې ته خاصه پاملرنه وکړي،ترڅو په راتلونکو کلونو کې بیاځلي د نيالګيو کېنولو ته اړتيا پیدانه شي.

د کندهار ښار یو تن اوسېدونکی وايي:« هر کال زرګونه نیالګي کېنول کېږي، خو ډېره برخه یې د نه پاملرنې له امله بېرته له منځه ولاړ شي. موږ له ښاریانو او مسوولینو غواړو،چې ساتنې او پالنې ته یې زیاته پاملرنه وکړي.»

د کندهار اوسېدونکي وايي، په تيرو کلونو کې هم د حکومت له خوا ورته د نيالګيو کېنولو پروسي ترسره شوي،خو په خبره يې چې ياد نيالګي نه د پاملرنې له امله وچ شوي دي.

ښاریان د نیالګیو په پالنه کې د حکومت او عامو خلکو مسووليت مهم ګنې اوغوښتنه کوي،چې باید د نویو کېنول شویو نيالګيو روزنې او پالنې ته جدي پاملرنه وکړي.