Skip to content
د ژمي په رارسېدو سره په کابل کې سږ کال د دویم لاس توکو یا لیلامي بازار د تېرو کالونو پرتله ښه شوی دی.
د لیلامي توکو یو شمېر پلورونکي وايي، بازار يې ځکه تود شوی،چې زياتره کاروبارونه اغېزمن شوي، کاري فرصتونه له منځه تللي او خلک هم هڅه کوي، همدا ارزان بيه لیلامي توکي واخلي.
د لیلامي توکو یو تن پلورونکی وايي:«هو! د لیلامي توکو پلور زيات شوی، بيخي زیات شوی دی، د بې روزګارۍ له امله زیات شوي دي.کارو بارو نشته.»
د لیلامي توکو یو بل پلورونکی بیا وايي:« پېرېدونکي زيات شوي دي، ځکه زيات شوي دي،چې خلک غريب دي، د پنځو روپو شي ته یې وس نه کېږي د شل روپو شی اخلي. همدغه پسې ګرځي،لوړ شي ته يې وس نه رسېږي.»
د لیلامي توکو په پلورونکو کې ځینې داسې هم شته چې وايي، که بازار يې تود هم دی، خو بيا يې هم د ټولې ورځې مزدوري دوه سوه افغانۍ وي،چې د کور سرپرستي پرې سخته ده او له اسلامي امارته د کارو بار د پيدا کېدو غوښتنه کوي.
د لیلامي توکو یو تن پلورونکی وايي:« توکي ارزانه شوي،خو چې چا سره پيسې نه وي نو په څه شي يې واخلي. همدا کورتۍ چې په دوکان کې اخلې، په زر، دولس يا ديارلس زره افغانۍکيږي،دلته يو نيم سل، دوه سوه يا سل افغانۍ کېږي.»
عام خلک هم مني،چې وروستی سياسي تحول د دې لامل شوی دی،چې د پيسو له کمبود سره مخ دي، نو هڅه کوي،د سپما په خاطر د سږ کال ژمي له پاره ليلامي لباسونه راونيسي.
د کابل ښار یو تن اوسېدونکی وايي:« د اقتصاد له پلوه خو زه هڅه کوم،چې اتيا سلنه دلته ليلام فروشۍ ته راشم، چېرته چې ليلام فروشي وي،کوشش کوو چې هلته ولاړ شو، ځکه بې روزګاري زياته ده.»
د پوښاک وسايلو ليلام فروشۍ ته د خلکو د پام وراوښتو سره هم مهاله هغه هټيوال چې په کې ياد وسایل پر لوړه بيه پلورل کېده، پلور يې اغېزمن شوی او وايي، پېرېدونکي يې خورا کم شوي دي.
