د پاکستان بهرنیو چارو وزیر شاه محمود قریشي ویلي،راتلونکي میاشت د افغانستان شپږ ګاونډي هېوادونه په چین کې سره کینې او په افغانستان کې د وروستي اقتصادي او بشري وضعیت په اړه سره بحث کوي.
قریشي ویلي، د چین د دغې ناستې په څنډه کې به د کابل ، اسلام اباد او بیجینګ ترمنځ هم درې اړخیزه ناسته وشي او موخه به یې په سیمه ییزو پروژو کې د افغانستان ګډون وي،
هغه زیاته کړې:«راتلونکي میاشت د افغانستان شپږ ګاونډي هېوادونه په چین کې سره کینې او په افغانستان کې د وروستي اقتصادي او بشري وضعیت په اړه خبرې او بحث کوي. د چین ناستې په څنډه کې به د افغانستان، پاکستان او چین درې اړخېزه ناسته هم وشي او په هغه کې به په سیمه ییزو پروژو کې د افغانستان پر ګډون خبرې وشي.»
د سیاسي چارو تحلیل کوونکي بیا د چین ناسته د افغانستان لپاره اغیزمنه ګڼي،چې په خبره یې اسلامي امارت بیا له دغې ناستې پوره ګټه واخلي او له چمتوالي سره په کې ګډون وکړي.
د سیاسي چارو شنونکی عزیز معار ج وايي:« په چین کې ناسته چې د افغانستان ټول ګاونډي په کې ګډون کوي، دا د افغانستان لپاره ډېره اغیزمنه ده،که چیرې طالبان د دې ناستې لپاره داسې چمتوالی ولري،چې له دې ګټه واخلي،نو ګټوره به وي او که نه وي داسې دا به هم د تیرو ناستوپه څير بې ګټې وي.»
د پوهنتون استاد فیض محمد ځلاند بیا د چین ناسته د سیمه ییزې همغږۍ لپاره مهمه ګڼي.
ځلاند وايي،چین کولای شي، د سیمې اوسني وضعیت د لا ښه والي لپاره همکاري رامنځ ته کړي او دغه همکاري به د اسلامي امارت مشران دې ته متوجې کړي،چې د سیمې د ستونزو په حل کې هڅې وکړي.
هغه زیاتوي:« په چین کې ناسته به د سییمه ییزې همغږۍ لپاره زیاته اغزمنه تمامه شي، ځکه سیمه ځینې امنیتي او د سیاسي کړکیچ په تړاو اندیښني لري او چین کولای شي، د اوسني وضعیت د لا ښه والي لپاره همکاري رامنځ ته کړي او دا همکاري به د طالبانو له مشرانو سره مرسته وکړي،چې دوی د سیمې اندیښنې واوري او په حل کې یې هڅه وکړي.»
په دې ناسته کې ایران، ترکمنستان، ازبکستان، تاجکستان، چین او پاکستان ګډون کوي.
د راپورونو له مخې،په دې ناسته کې افغان لوري ته هم د ګډون بلنه ورکول کېږي او اسلامي امارت هم هم منلې،چې په داسې ناستو کې،چې د سیمې او افغانستان پر ګټه وي، ونډه اخلي.
