Skip to content
په سوېل کې د پکتیا ولایت مرکز ګردیز، احمد ابا، زرمت ، سیدکرم او جاني خیلو ولسوالیو کې سیلابونو یو ځل بیا خلکو ته درانه مالي زیانونه اړولي دي.
ګردیز،زرمت او احمد ابا ولسوالیو کې د نورو زیانونو تر څنګ سېلابونو ګن کورونه هم ویجاړ کړي دي .
د احمد ابا ولسوالۍ یو تن اوسېد ونکی وايي:« د ماښام له اذان وروسته، اوبه راغلې، تر سهاره پورې د سېلاب اوبو دوام وکړ. تر سهار مو هېڅ خوب نه دی کړی. د کور خونې مو تاسو هم ولېدلې،چې ټولې لوېدلي دي.»
د مرکز ګردیز یو تن اوسېدونکی بیا وايي:« زموږ د کورونو خونې سېلابونو ټولې له کاره اېستلي دي. ماشومان مو له کوره اېستلي دي او خیمه کې ژوند کوي.»
سیلاب ځپلې کورنۍ وایي،کورونه او کروندې یې اوبو وړي او سرپناه او د خوراک لپاره څه نه لري.
په ورته وخت کې دوی له اسلامي امارته او مرستندویه بنسټونو د خوراکي توکو او سرپنا غوښتنه کوي.
د زرمت ولسوالۍ یو تن اوسېدونکی وايي:« له حکومته او خیریه بنسټونو مو غوښتنه دا ده،چې له موږ سره مرستې وکړي. که مرستې وشي، موږ به بېرته کورونه پرې جوړ کړو.»
د یاد ولایت پیښو ته د رسېدو چارو ریاست مشر نثار احمد نجات وایي، د سېلابونو له کبله د اوښتو زیانونو مالومولو لپاره سیمې ته د سروې ټیمونه یې استولي او وروسته به له اړمنو کورنیو سره مرستې وي.
نجات زیاتوي:« ځینو سېمو کې کورونه وېجاړ شوي دي. سېلابونو خلکو ته په بېلابېلو برخو کې یې زیانونه اړولي دي.»
د مالوماتو له مخې،له تیرې یوه نیمې میاشتې راهیسې د سېلابونو له کبله په پکتیا کې ۱۲ کسان مړه او ۱۴ ژوبل دي،د استوګنې شپږ سوه کورونه ویجاړ شوي او زرګونه جریبه کرنیزې ځمکې هم تخریب شوي دي.
