Skip to content
د افغانستان اسلامي امارت د پوهنې وزارت سرپرست وزیر انور منیب په پکتیا کې د شنبې پر ورځ د « ۱۴۰۱ کال د زمري پر ۱۵ مه» د یوې لوې یتیم خونې پرانېسته وکړه.
منیب وایي،هېواد کې به په ورته ډول جوړو شویو یتیم خونو کې کې د اسلامي امارت او د مخکېني حکومت د سرتیرو ماشومانو یو ډول پالنه او روزنه ترسره کېږي.
منیب زیاته کړه:« هغه د ملي اردو،ملي پولیسو او اربکیانو،چې د امریکایانو په ملګرتیا او د هغوی د هدفونو لپاره یې ځانونه قرباني کړي،د هغوی بچیان به موږ هم دلته تربیه کوو.»
د دغې یتیم خونې میاشتنی لګښت د ترکیې سرې میاشتې له لوري ورکول کیږي او شااوخوا ۳۰۰ یتمانو ته په کې د روزنې او پالنې تابیه نیول شوې.
په سویل ختیځ زون کې د ترکیې سرې میاشتې استازی مسعود وايي:« زه الله ته دعا کوم، چې موږ ته دې د بچیانو د غوره روزنې توفیق راکړي او بیا هم د پوهنې له تشکیل او چارواکو د دغه بهیر د ښه تعقیب غوښتنه کوم.»
اخوا د پکتیا والي محمد علي جان بیا وايي، په پام کې لري،چې د زون پر کچه د یتیمو ماشومانو لپاره یو لویه یتیم خونه جوړه کړي،ترڅو له بېلابېلو ولایتونو په کې زرګونه یتیمانو ته د زده کړو او پالنې زمېنه برابره شي.
هغه زیاتوي:« موږ اراده لرو، یو داسې تعمیر جوړ کړو،چې د زون پر کچه په کې یتیم خونه فعاله کړو او وکولای شو،دلته د یتمیانو ساتنه او پالنه وکړو او ښه روزنه ورکړو.»
د پکتیا یتیم خونه په ګردیز ښار کې د بابرک خان لیسې په تازه جوړو شویو ودانیو کې جوړه شوې، او د ګردیز او بېلابېلو ولسوالیو لسګونه یتیمانو ته په کې پالنه او روزنه ورکول کېږي.
