په پکتیا کې د کب لسمه ونمانځل شوه

د پکتیا ولایت په اریوب ځاځیو ولسوالۍ کې د سه شنبې پر ورځ د « ۱۴۰۰ کال د کب پر ۱۰ مه» له امریکا سره د اسلامي امارت د سولې تړون یا د کب لسمه  ونمانځل شوه.

 په دې اړه جوړو شویو مراسمو کې د اریوب ځاځیو ولسوال ظاهر ګل  دغه ورځ د افغان ولس لپاره تاریخي او له ویاړه ډکه وبلله او د اسلامي امارت له مشرانو یې وغوښتل،چې د ولسونو ستونزو ته رسېدنه وکړي.

ظاهرګل وايي:« زموږ غوښتنه د  اسلامي امارت له مسوولینو دا ده،ترڅو د همدې مظلوم ولس  چوپړ وکړي.خلکو ته به د امن او چوپړ کولو ډاډ ورکوي. له عام ولسه هم غوښتنه دا ده،چې له اسلامي امارته په ککله ملاړ وکړي.»

د استخباراتو مدیر مولوي عزایر یاسر  وايي:« دا داسې یوه غوره ورځ ده، چې پر دې ورځ اشغال پای ته رسېدلی دی. پر دې ورځ د کفر څومره زور واکي طاغوتي نظامونه چې دي، افغانستان کې چپه شوي او ختم شوي ديي.» 

د اریوب ځاځیو ولسوالۍ اوسېدونکي بیا د جګړې په پای ته رسیدو او د دوحې سولې تړون لاسلیک ته خوشاله دي.

دوی د اسلامي امارت له مشرانو غواړي،چې له خلکو سره له حوصلې کار واخلي او بېلابېلو برخو کې ورته چوپړتیاوې او د بیارغونې کارونه ترسره کړي.

د اریوب ځاځيو ولسوالۍ یو تن اوسېدونکی وايي:« د آریوب ځاځیو له مشرانوغواړو، چې ۴۳ کاله دغه ولس رنځونه لیدلي. ډېر رنځیدلی دی. ولس دې ته اړتیا لري چې د شفقت په غیږه کې ونیول شي او په بیا رغونه کې

چې د روغتیا برخه ده، معارف برخه  او زراعت برخه ده، ټولې ورغوي.»

پوره دوه کاله وړاندې د کب پر ۱۰ اسلامي امارت د امریکا له متحده ایالتو سره له اوږدو مذاکراتو وروسته دوحه کې د سولې تړون لاسلیک کړی،چې له مخې امریکایان له هېواده ووتل او اسلامي امارت واک ترلاسه کړ.