Skip to content
لوګر ولایت کې ځايي مسوولین وايي،په خوښۍ ولسوالۍ کې د وروستیو سېلابونو له کبله ۲۰ کسان مړه شوي، ۳۲ ژوبل او ۳ زره کورونه تخریب شوي دي.
د یاد ولایت امنیه قوماندانۍ ویاند احمد الله انس وايي، د سېلابونو له کبله دوه زره څاروي هم مړه شوي او پنځه زره جریبه کرنیزه ځمکه هم تخریب شوې.
انس زیاتوي:« د سېلابونو له امله مو ۲۰ تنه هېوادوال شهیدان شوي او ۳۲ نور ژوبل دي، شااوخو ۳ زره کورونه له منځه تللي او ۲ زره حیونات هم مړه شوي.»
سېلاب ځپلې کورنۍ د وړمې ورځې سېلابونو او ورته د اوښتو زیانونو کیسې کوي.
د خوښۍ ولسوالۍ یو تن سېلاب ځپلی وايي:«سېلابونو خلکو ته زیات زیانونه رسولي دي. خلک سرپناه نه لري. خلکو یوازې له کورونو ځانونه اېستلي او نور هرڅه سېلاب وړي دي.»
سېلاب ځپلې کورنۍ وايي، هر څه یې په اوبو لاهو شوي او سرپناه او خوراکي توکو اړتیا لري.
په ورته وخت کې دوی له اسلامي امارت او مرستندویه بنسټونو د بېړنیو مرستو غوښتنه کوي
سیلاب ځپلو ته د استوګنې لنډ مهاله پنډغالی په پام کې نیول شوی دی، چې لومړني کارونه پیل شوي او مسوولین له مرستندویه بنسټونو غواړي، چې سېلاب ځپلو سره دې بېړنۍ مرستې وکړي.
