په بریټانیا کې د افغانستان سفارت چارسمبالي زلمي رسول په پلازمېنه لندن کې د افغانستان سفارت دروازه وتړله او کیلي یې د دغه هېواد د بهرنیو چارو وزارت ته وسپارلې.
دا پریکړه د یاد هېواد د بهرنیوچارو وزارت د هغې غوښتنې پربنسټ شوې چې د روانې سپټمبر پر۲۷ مه نېټه یې د سفارت تړلو غوښتنه کړې وه.
د سیاسي چارو کارپوهان وایي، بریټانیا هڅه کوي له بېلابېلو لارو پراوسني سرپرست حکومت فشارونه راوړي او په خبره یې په اوسنیو شرایطو کې اړتیا ده چې دواړه لوري د فشارونو پرځای د خبرو له لارې روانې ستونزې حل کړي.
د سیاسی چارو کارپوه محمد زلمی افغانیار وايي: « دا چې په لندن کې د افغانستان سفارت تړل شوی، موخه یې د افغانستان پر سرپرست حکومت فشار راوړنه ده. هلته مېشت زرګونه افغانان قکونسلکي خدمتونو ته اړتیا لري خو اوس به څنګه خپلې ستونزې هوارې کړي. هر ډول تقابل ته د خبرو اترو له لارې حل پیدا کېږي؛ باید د سیسټماتیک فشار پر ځای خبرو ته سره کېني.»
ځېنې نور بیا په دې باور دي چې په لندن کې د افغانستان سفارت تړل به هلته مېشت افغانان له ګڼو ستونزو سره مخامخ او له کونسلي خدمتونو به یې بې برخې کړي.
د سیاسي چارو کارپوه صادق حمیدزوی وايي: « د سفارت چارې تر ډېره تخنیکي وي او هغو افغان وګړو ته خدمتونه وړاندې کوي چې ورته اړتیا لري. که دا لړۍ بنده شي، ښکاره خبره ده چې افغانان به له ستونزو سره مخامخ شي. باید ووایم چې دا خپله لوی ظلم دی چې په سفارت کې ناست کس د افغانستان له حکومت سره هېڅ ډول اړیکه ونه لري او نه داسې اسانتیاوې لري چې د خلکو خدمت پرې وکړي.»
دا په داسې حال کې ده چې شاوخوا دوه میاشتې وړاندې د اسلامي امارت د بهرنیو چارو وزارت په بريټانیا او یو شمېر اروپايي هېوادونو کې د افغان سفارتونو او کونسلګریو له خوا وېشل کېدونکي اسناد او کونسلي خدمتونه بې اعتباره اعلان کړل.
د بهرنیو چارو وزارت چارواکي وايي، په یادو هېوادونو کې د سفارتونو مسوولینو د سرپرست حکومت د بهرنیو چارو وزارت پریکړې نه منلې او واک ته د اسلامي امارت له رسېدو وروسته یې د دې وزارت قوانین او اصول نه رعایت کول.
