خبریال حارث سیار وايي:« خصوصي رسنۍ چې په بغلان ولایت کې فعالې دي، یوازینۍ ستونزه یې د مارکټ نشتوالی او اقتصادي ستونزې دي. یو شمیر خبریالانو د اقتصادي ستونزو له امله خپلې دندې له لاسه ورکړي دي او هېله لرو،چې اسلامي امارت دغو ستونزو په حل کې رسنیو سره مرسته کړي.»
په بغلان کې د رسنیو د همغږۍ مرکز مشر نورګل اندړوال له چارواکو غواړي،چې د خبریالانو ملاتړ وکړي او رسنیو سره همکاري زیاته کړي او په وینا یې روان وضعیت به د ګڼو رسنیو دروازې وتړي.
اندړوال زیاتوي:« اقتصادي ستونزې د سیمه ییزو رسنیو د خبریالانو د کار پر وړاندې خنډ دي او د اسلامي امارت له مسولینو زموږ غوښتنه دا ده،چې په بغلان کې ولایت کې د رسنیو او خبریالانو د ضیعت د ښه کیدو لپاره اقدام وکړي.»
سیمه ییز چارواکي بیا وايي، د بیان ازادۍ ته ژمن دي او رسنۍ له هر ډول محدودیت پرته کولای شي، چې د حکومتي چارواکو پر کړنو خبرونه جوړ کړي او د خلکو ستونزې تر مسولینو ورسوي.
د بغلان د اطلاعاتو او کلتور مشر اسدالله هاشمي وايي،د نورو ولایتونو پرتله دلته اقتصادي وضیعت ښه دی او له رسنیو او خبریالانو سره هرډول همکارۍ ته چمتو دي.
هاشمي زیاتوي:« دلته په بغلان ولایت کې هېڅ ډول محدودیت پر رسنیو نشته دی. رسنۍ دلته ازادې دي او څوک چې اندیښنه لري کولای شي وضیعت له نږدې وګوري. د نورو ولایتونو پرتله په بغلان کې ماليي وضعیت هم ښه دی،خو داسې هم نه ده چې خنډونه بیخي نه شته دی.»
د جمهوریت له سقوط سره سم په ټول هیواد کې رسنۍ له مالي او اقتصادي ستونزو سره مخ شوي دي او لاهم دغه ستونزه پر خپل ځای ده.
تیرو پنځه میاشتو کې شااوخوا ۱۵۰چاپي، تصویري او غږیزو رسنیو فعالیت درولی او ګڼو خبریالانو دندې له لا سه ورکړې دي.
اطلاعاتو ته نه لاس رسنۍ بله هغه ستونزه ده،چې افغان خبریالان ورسره مخ دي،خو تر اوسه پورې په دغه برخه کې د مسولینو له لوري کوم اقدام نه دی شوی.
