Skip to content
په لومړي ځل په افغانستان کې د تیلو بیې په بې مخینې توګه لوړې شوي،چې خلک او موټر چلوونکي ترې شکایت لري .
په کابل او د هېواد په نورو ښارونو کې د یو لیټر دیزلو بیه نږدې ۱۳۰ افغانیو ته لوړه شوې،چې له امله یې یا خلکو موټر درولي او یاهم موټر چلوونکو کرایه لوړه کړې ده.
په دې تړاو د ریاست الوزرا اقتصادي مرستیال غبرګون ښودلی او زیاته کړې یې ده،چې د تېلو بیې د راکمولو لپاره به جدي اقدام وکړي.
له یاد معاونیت څخه پهخپره شو خبرپاڼه کې خبر ورکړی،چې ځینې داخلي کړۍ د تېلو د بیې په لوړوالي کې لاس لري او هڅې روانې دي،چې دغه کړۍ کشف او قانوني چلن به ورسره وشي.
د خبرپاڼې یوه برخه:« د تېلو نرخونو په لوړولو او د بحراني حالت په رامنځته کولو کې ځینې کړۍ لاس لري. معاونیت د نرخونو د راټیټولو په اړه له ټولو ممکنو لارو کار اخلي او هغه اشخاص څاري، څوک چې د دې عمل مرتکب کيږي. د ادعاوو د ثبوت په صورت کې به له عاملینو سره سخت قانوني چلن وشي او د تېلو تجارتي جواز په اړه به یې جدي غور وشي.»
په ورته وخت د افغانستان سوداګرۍ او پانګونې خونې مشر یونس مومند بیا وايي،درې سترو لاملونو په افغانستان کې د تیلو بیه لوړه کړې،دهغو بې کیفیته تېلو پر واردولو بندیز،چې له ایران نه راتلل ، په نړیوالو بازارنو کې د تېلو بیې لوړوالی او په ترکمنستان د افغانستان په نوم تیل اخیستل کیږي،چې یا اروپا ته انتقالیږي .
مومند وايي، داهغه مسایل دي،چې په افغانستان کې یې د تېلو بیې لوړې کړي دي.
هغه زیاته کړه:« یو داسې دی،چې د تیلو نړیوالې بیې لوړوالی دی او بل دا چې هغه تیل چې پخوا له ایرانه افغانستان ته راتلل، د افغانستان له سټنډرد سره برابر نه ول، اوس دغه تیل بند شوي دي،چې ورسره بازارونو کې تقاضاء لوړه شوې ده،یو بل دلیل یې هم دادی،چې په ترکمنستان کې د افغانستان په نوم تیل اخېستل کیږي،خو بیا دغه تیل اروپا ته وړل کیږي،چې زموږ لپاره یې زیات توان کړی دی.»
خو د راپورونو پر اساس د تېلو په نړیوال بازار کې د تېلو بیه یوه اندازه راکمه شوې،خو لاهم په افغانستان کې یې قیمت پورته روان دی.
د تېلو د پلور په نړیوال بازار کې د یوه بیلر تېلو په قیمت کې له لسو تر دریالس ډالره کمښت راغلی دی.
