څو ورځې وړاندې د امریکا دفاع وزارت مرستیالې ویاندې صبرینا سنګهـ د افغانستان په فضا کې د امریکا اړوند ډرون الوتکو ګرځېدل تایید کړل او دغه چاره یې د افغانستان په ګډون د سیمې د څارنې لپاره اړین وبلله.
تازه د پنټاګون ویاند وایي، د اړتیا په صورت کې د افغانستان په ګډون په سیمه کې پر امریکا د ضد اهدافو د برید حق لري.
پټ رایډر په خپل ورورستي خبري کنفرانس کې د یوې پوښتنې په ځواب کې ویلي، د امریکا ګټو ته د ګواښ په صورت کې به پر نښه شویو اهدافو هوایي بریدونه وکړي.
رایډر زیاته کړې: «موږ به ټول هغه بریدونه په سم وخت کې اعلان کړو، چې زموږ له خوا ترسره شوي وي. خو زه یې تر اوسه په اړه مالومات نه لرم او نه مو هم تر اوسه پورې داسې څه خپاره کړې. له شک پرته، که پر امریکا یا زموږ پر ګټو هر راز پېښدونکي ګواښونه زموږ تر سترګو شي، موږ یې د هوا له لارې بریدونو په ګډون پر وړاندې د مناسبو ګامونو پورته کولو حق لرو؛ خو په دې اړه دامهال د اعلان لپاره څه نه لرم.»
د سیاسي چارو کارپوهان د امریکايي چارواکو د دې څرګندونو لامل د افغانستان د دوښمنانو او ګاونډیانو لمسون بولي.
د سیاسي چارو کارپوه ادریس ځاځی وايي: « زه فکر کوم دا بیا ځل د افغانستان د دوښمنانو او ګاونډیانو دسیسې دي، ترڅو د امریکا دفاع وزارت وهڅوي، چې ګوندې له افغانستان ګواښ شته دی او دلته ډلې ټپلې روزل کېږي؛ منطقي خو دا ده، چې نړیوال سازمانونه له اسلامي امارت سره مرسته وکړي چې له وسله والو ډلو سره مبارزه وکړي.»
د پنټاګون ویاند زیاته کړې، که څه هم تر اوسه امريکايي ځواکونو د ورته بريدونو په اړه اقدام نه دی کړی، خو که دا ډول عملیات کېږي، نوهوايي بریدونه یې یقیني چاره ده.
اسلامي امارت بیا وایي، په افغانستان کې سوله او ټیکاو رامنځته شوی او هېچا ته اجازه نه ورکوي، چې له افغانستانه بل چاته ګواښ پېښ کړي او دغه راز په دې برخه کې د هېوادونو اندېښنې بې ځایه ګڼي.
په قطر کې د اسلامي امارت سیاسي دفتر مشر سهېل شاهین وايي: « اسلامي امارت په تېرو درېیو کالو کې دا ثابته کړې چې افغان خاوره د بل چا پر ضد کارېدلو ته نه پرېږدي او دغه راز یې د داعش ډلې پر وړاندې هم کامیابه مبارزه کړې؛ دغه ډله اوس په افغانستان کې ځپل شوې او له نړیوالو غواړو، چې دغې ډلې ته لابي ونه کړي. د اسلامي امارت په راتګ سره د داعش ډلې غړي له افغانستانه وتلي او څوک دې په دې اړه اندېښنه نه کوي»
د پوځي چارو کارپوهان وایي، د اسلامي امارت په حاکمیت سره ترهګرې ډلې ځپل شوې او دغه ډلې په نورو ګاونډیو هېوادونو کې مېشتې دي، چې په خبره يې د مخینوي لپاره دې يې ملګرو ملتونو امنیت شورا لاس په کار شي.
د دوی په وینا، واشنګټن هڅه کوي، چې د دې ډول فشارونو له لارې خپلو سیاسي موخو ته ورسېږي.
د پوځي چارو کارپوه توریالی ځاځی وايي: «دا هغه سیاسي فشارونه دي،چې امریکا یا پنټاګون یې پر طالبانو راوړي. د دې لامل د ګاونډي پاکستان هغه منفي تبلیغات دي، چې د طالبانو پر ضد یې ترسره کوي. په داسې حال کې چې ټوله نړۍ پوهېږي، چې داعش او نورې ترهګرې ډلې اوس په پاکستان کې مېشتې دي، خو د نړۍ سترګې پرې پټې او غوږونه یې کاڼه دي.»
له دې مخکې هم د امریکا بهرنیو چارو وزارت ویلي و، چې سرپرست حکومت په افغانستان کې د ترهګرۍ پر ضد د مبارزې ژمنه کړې او باید پر خپلو ژمنو ودرېږي.
سرپرست حکومت په کراتو ډاډ ورکړی، چې هېڅ کله اجازه نه ورکوي، چې د افغانستان له خاورې د نورو هېوادونو پر وړاندې کار واخیستل شي.
