تهران د هلمند سیند په اوبو کې د حق آبې په تړاو د تېر کال له اسلامي امارت سره د شوې هوکړې سربېره بیا هم په دې اړه د حق غوښتنه کوي.
د ایران ولسمشر مسعود پزشکیان ویلي، له اسلامي امارت سره يې د حق آبې پر سر خبرولو لپاره يو ټيم ټاکلی چې په دې اړه به مذاکرات وکړي.
پزشکيان تمه ښودلې چې ټاکل شوی پلاوی به د دواړو هېوادونو ترمنځ په ياده برخه کې شته ستونزې هوارې کړي.
هغه په دې اړه وايي: « د حق آبې په اړه، ټاکل شوی محترم والي صاحب او هم ټاکل شوی ټیم له خپل ورور ګاونډي هېواد افغانستان سره کېنو او د خبرو له لارې زموږ د حق آبې ونډه ترلاسه کړو. یو شمېر نور پروګرامونه هم چې په دې اړه شته دي، اوس د ولایت او انرژۍ وزارت له لارې تعقیبېږي او تمه لرو چې ستونزې هوارې کړو.»
له دې سره په یوه وخت، ځينو ایراني رسنيو د دې هېواد د انرژۍ وزیر له قوله لیکلي، د هلمند په اوبو کې د حق آبې موضوع له اسلامي امارت سره د تعامل له لارې په جدي ډول څاري او په خبره یې خپلو وګړو ته د دومداره اوبو چمتو کولو لپاره ژمن دي.
د ایران د انرژۍ وزیر علي ابادي ویلي: « زموږ هڅه دا ده چې هر ځای کې خپلو هېوادوالو ته با ثباته او کیفیت لرونکې اوبه تامین کړو. سیستان او بلوچستان کې به هم د حق آبې موضوع په جدي توګه له افغانستان سره د تعامل له لارې وڅارو.»
بله خوا، د اوبو او انرژۍ وزارت سرپرست عبداللطیف منصور وایي، د هلمند په اوبو کې د ایران حق آبې موضوع د تهران او کابل په تفاهم حل شوې او ایران تېر کال خپله حق آبه ترلاسه کړې ده.
منصور زیات کړې:« د ایران د انرژۍ وزارت د څرګندونو په ځواب کې باید ووایم چې موږ له هغوی سره ناستې کړې او ستاسو ټیم هم په دې اعتراف کوي. موږ ایران ته د تېر کال حق آبه ورکړې او ښه به وي چې په دې اړه خبرې د بهرنیو چارو وزارت له خوا وشي.»
د اقتصادي چارو يو شمېر شنونکي په دې باور دي چې د اسلامي امارت او ایران ترمنځ د شوې هوکړې پر بنسټ دغه هېواد د خپل حق دوه برابره زياتې اوبه ترلاسه کړې او اوس دغه هېواد د دې ډول څرګندونو په کولو سره غواړي شوې هوکړه نقض کړي.
د اقتصادي چارو شنونکی سید مسعود وايي: « دوی په کال کې ۲.۵ میلیارد مترمکعبه اوبه وړې دي. په دې حساب، ایران هر کال ۱.۵ میلیارده مترمکعبه زیاتې اوبه له موږ اخیستې دي. که دا اوبه له ۱۳۵۱ کال راهیسې حساب کړو، دوی د نړیوالو بیو له مخې،ؤ د ۱۵۰ میلیارد ډالرو په ارزښت زیاتې اوبه ترلاسه کړې. په نړیوالو بازارونو کې یو مترمکعب اوبه ۱.۵ تر ۲ ډالرو قېمت لري.»
د اقتصادي چارو شنونکی نورالله عزیز وايي: « افغانستان ضرورت لري چې خپله ۱۸ میلیارد مترمکعبه اوبه زموږ پانګه او ملي سرمایه ده، مهار کړي او له دې لارې په مختلفو پروژو تمرکز وکړي.»
ایراني چارواکي دغه څرګندونې داسې مهال کوي چې وړمه ورځ د رئیس الوزراء پخواني سياسي مرستيال مولوي عبدالکبیر افغانستان لپاره د ایران سرپرست سفیر سره په کتنه کې ويلي وو چې د هلمند په اوبو کې د حق آبې مساله د دواړو هېوادونو په تفاهم حل شوې او په دې اړه نامسولانه څرګندونې د دواړو هېوادونو اړيکې زيانمنوي.
