Skip to content
وروسته له هغې چې د اقتصاد وزارت په یوه مکتوب کې په کورنیو او بهرنیو غیر دولتي موسسو کې د ښځو پر کار بندیز ولګاوه، په غبرګون کې یې د ژغورنې نړیوالې کمیټې هم خپل فعالیتونه ودرول.
د ژغورنې نړیوالې کمېټې ویلي، چې د دوی ټول فعالیتونه د میرمنو په مرسته ترسره کېدل.
یادې کمېټې زیاته کړې:«د ژغورنې نړیواله کمیټه په انجو ګانو کې د ښځو پر کار د طالبانو بندیز په غبرګون کې افغانستان کې خپل ټول فعالیتونه ځنډوي. د خدماتو رسولو برخه کې زموږ وړتیا زموږ پر ښځینه کارکوونکو تکیه دي. که هغوی کار نه شي کولی موږ هم کار نه شو کولی.»
له دې سره په هېواد کې د ماشومانو د خوندیتوب ادارې( سیف د چیلډرین) هم پر یادې پریکړې خپله خواشینی څرګنده کړې او د ښځو ونډه په کاري برخه کې مهمه بولي.
د یادې ادارې مشر ه اینګر اشینګ وايي:«په انجوګانو کې د ښځو پر کار د طالبانو وروستۍ پریکړې خواشیني کړي یوو. ما په خپله له نږدې لیدلي،چې د بشري مرستو او فعالیتونو برخه کې د ښځو ونډه څومره اغیزمنه ده.»
هغه میرمنې چې په بهرنیو غیر دولتي موسسو کې يې دندې ترسره کولې وايې، یادې پریکړې ډیرې مایوسې کړي او په خبره یې که حالت په دې ډول دوام وکړي،نو ډېری میرمنې به له روانې ستونزو سره مخامخ شي.
له دې مخکې د اقتصاد وزارت د مکتوب په غبرګونکې چې ګواکې میرمنې نورې نه شي کولی خپلو کارونو ته ادامه ورکړي، د سویډن، ډنمارک او ناروې موسسو هم خپل فعالیتونه درولي دي.
