د ننګرهار په بهسودو ولسوالۍ کې د شهاب الدین په نوم ملکي وګړي پر کور وړمه شپه ۱۲ بجې د پاکستان پوځي رژیم الوتکو بمبارۍ کې د دې کورنۍ ۱۸ غړي شهیدان او ۵ نور ژوبل شوي.
د ننګرهار امنیه قوماندانۍ مسوولین وايي، بریدونه د ننګرهار په بهسودو، خوګیاڼو او غني خېلو ولسوالیو کې ترسره شوي دي او په ټولو کې ملکي وګړو ته مرګ ژوبله اوښتې.
د ننګرهار امنیه قوماندانۍ ویاند سید طییب حماد وايي: « پاکستان د تېرو تجاوزونو په دوام، تېره شپه شاوخوا ۱۲ بجې یوځل بیا د ننګرهار ولایت په بهسودو، خوګیاڼو او غني خېلو ولسوالیو کې هوايي بریدونه ترسره کړل چې په کې تر ډېره ښځې او ماشومان په شهادت رسېدلي. د بهسودو ولسوالۍ په مربوطاتو کې د یوې کورنۍ ۲۳ غړي تر خاورو لاندې شوي وو چې له ډلې یې ۱۸ کسان په شهادت رسېدلي او پنځه نور ژوبل شوي دي.»
د پاکستاني الوتکو له خوا په نښه شوي کور یو تن غړی نزاکت وايي، دوی له هېڅ یوې وسله والې ډلې سره اړیکه نه لري او نه پوهېږي چې ولې یې کور نیمه شپه په نښه شوی دی.
د پاکستان پوځي رژیم د هوايي برید قرباني نزاکت وايي: « زه د کورنیو له غړیو سره کور کې ویده وم چې برید ترسره شو. د کورنۍ ښځو او ماشومانو چغې راته وهلې چې له خاورو یې را وباسم.»
ننګرهار مېشتي د دې پېښې غندنه کوي او له حکومت او نړیوالې ټولنې غواړي چې له پاکستان څخه د داسې بریدونو پوښتنه وکړي.
د ننګرهار اوسېدونکی رحیم الله وايي: « موږ د دغه شان پېښو مخنیوی غواړو. دا ډېر ظالمانه او وحشیانه بریدونه دي.»
د ننګرهار اوسېدونکی عبد الله وايي: « موږ په دې پېښه ډېر دردمن یو، باید مخنیوی یې وشي.»
له دې شاوخوا درې میاشتې وړاندې هم د کونړ په مرکز اسعد اباد ساګي سیمه کې پاکستاني الوتکو د عبد الوهاب په نوم د یوه ملکي وګړي کور په نښه کړی و.
ټینګار دا دی چې نړیواله ټولنه او د بشري حقونو نړیوالې ادارې باید پر پاکستان د داسې بریدونو له امله فشارونه زیات کړي، ترڅو راتلونکي کې دا ډول کړنې ترسره نه شي.
