د پاکستان پوځي رژیم له افغانستان سره په روانه جګړه کې پر ملکي سیمو او ملکي وګړو بمباریو ته ادامه ورکړې.
د پکتیا امنیتي سرچینې تاییدوي چې مقابل لوري تېره شپه په ډنډ پټان ولسوالۍ کې د ملکیانو پر کورونو هوايي بریدونه کړي او د کورونو پر ویجاړېدو سربېره، د ښځو او ماشومانو په ګډون، یو شمېر عام وګړي شهیدان او ټپيان شوي دي.
د لوګر ۳۰۴ پلې لېوا ویاند محمد نوروز ځلاند وايي: « موږ د حجرې کلي په هغه کور کې یو چې د پاکستان پوځي رژیم په هاوانونو او بریدونو کې ویجاړ شوی. په دې کور کې یو شمېر ښځې، نارینه او ماشومان شهیدان او ژوبل شوي دي.»
همدارنګه، دفاع وزارت له ډیورنډ فرضي کرښې هاخوا د پوځي رژیم پر نظامي اهدافو د بریدونو خبره کوي او وایي، په داسې حال کې چې پاکستانی لوری په قصدي ډول ملکیان په نښه کوي، افغان ځواکونو په تېرو ۲۴ ساعتونو کې ډیورنډ فرضي کرښې پورې غاړې او د پاکستان په پلازمېنه اسلاماباد کې ګڼ پوځي اهداف په نښه کړي دي.
د ملي دفاع وزارت ویاند له خاورې د دفاع او امنیت ساتلو ډاډ ورکوي او وايي، تر اوسه د پاکستان له ۱۰۰ زیات پوځیان وژل شوي او ګڼې پوستې یې نیول شوې دي.
د ملي دفاع وزارت ویاند عنایتالله خوارزمي وايي: « د ملي دفاع وزارت ځواکونو د پاکستان له پوځي رژیم سره د جګړې له پیل راهیسې، زیاتې لاسته راوړنې درلودې. تر اوسه د دښمن له ۱۰۰ ډېر کسان وژل شوي او دغه راز د پاکستان نظامي رژیم له ۲۵ ډېرې پوستې هم نیول شوې دي.»
د چارو شنونکي بیا وايي، پاکستان د نړیوالو قوانینو خلاف په جګړو کې په دوامدار توګه ملکیان په نښه کړي.
دوی له ملګرو ملتونو او د بشري حقونو له نړیوال بنسټونو غوښتي چې د پاکستان پوځ او په کې ښکېل عناصر پر ملکیانو د برید له امله مسوول وګرځوي.
د سیاسي چارو شنونکی شهسوار سنګروال وايي: « ملګرو ملتونو، نورو نړیوالو بنسټونو او هېوادونو ته په کار ده چې پر پاکستان غږ وکړي چې د نړیوالو قوانینو خلاف دا ډول اعمال د زغم وړ نه دي او باید ترې لاس واخلي.»
د پاکستان پوځي رژیم داسې مهال له افغانستان سره په مخامخ جګړه کې ملکي وګړي په نښه کوي چې برعکس د افغان ځواکونو ټول تمرکز د پاکستان پر نظامي تأسیساتو او پوځیانو ورټول دی.
