پر ډېورنډ فرضي کرښه د وروستیو نښتو له امله، خوست کې له خپلو مېنو بې ځایه شوې کورنۍ وايي، دا مهال له سختو ستونزو سره مخ دي.
د دوی په خبره، د سرپناه، خوړو او لومړنیو اړتیاوو نه لرلو له امله یې ژوند له جدي ننګونو سره مخ دی.
دوی زیاتوي، دغه وضعیت تر ټولو ډېر ښځې او ماشومان اغېزمن کړي دي.
د جګړو له امله بې ځایه شوی معلم عمرګل وايي: « زه خپله د تاترې په مدرسه کې یم او په یوه مارکېټ کې مو ۱۳ کوره ځای پرځای کړي. دا د مارکېټ خاوند یوه همکاري وه چې موږ سره یې وکړه.»
بې ځایه شوی سید حبیب شاه وايي: « شپږ ورځې کېږي چې موږ له خپلو کورونو څخه راوتلي یو. دلته نه کور پیدا کېږي او نه هم کوټې؛ موږ له ډېرو ستونزو سره مخ یو.»
یو شمېر بې ځایه شوې کورنۍ دغه راز وايي، په ناڅاپي توګه بې ځایه کېدلو یې ستونزې لا زیاتې کړې دي او دا مهال خوراکي توکو، اوبو او روغتیايي اسانتیاوو ته جدي اړتیا لري.
دوی له اړوندو ادارو او مرستندویه بنسټونو غواړي چې له جګړو ځپلو کورنیو سره بېړنۍ مرستې وکړي او د سرپناه او لومړنیو اړتیاوو برابرولو لپاره عملي ګامونه واخلي.
بې ځایه شوي د جګړې له ښکېلو اړخونو هم غواړي چې د جګړو پر مهال د ولسي خلکو خوندیتوب ته پاملرنه وکړي.
د جګړو له امله بې ځایه شوی خیالي خان وايي:« کډې مو را بار کړې دي او د لکڼو په سر په ډاګونو کې پراته یو. هېڅ ډول سرپناه او حتا خېمه هم نه لرو.»
بې ځایه شوی عالي خان وايي: « همدا نن هم زموږ په کورونو توپونه لګېدلي، موږ یوازې خپل سرونه را ایستلی، کورونه او ځاروي مو پاتې دي.»
بې ځایه شوی کمال حسین وزیر وايي: « پاکستان ظلم روان کړی، دوی په ښځو او ماشومانو ډزې کوي، دا د نارینه کار نه دی.»
بې ځای شوی مسته خان وايي: « زموږ کورونه ړنګ شوي، دوکانونه او بازارونه ویجاړ شوي او ځینې کسان هم ژوبل دي. همدارنګه، موږ خپل څاروي هم د پاکستان په ډزو کې له لاسه ورکړي.»
د ځایي حکومتي مسوولینو د معلوماتو له مخې، دا مهال د خوست په ګربزو، ځاځي میدان، علیشېرو او تریزیو ولسوالیو کې په فرضي کرښه د جګړو له امله، نږدې پنځه زره کورنۍ له خپلو سیمو او کورونو بې ځایه شوې دي.
د چارواکو په خبره، له دوی سره د مرستو هڅې هم دوام لري.
