د پاکستان پوځي رژیم دا ځل د ټولو اسلامي او انساني نورمونو خلاف په کابل کې لسګونه هغه روږدي کسان شهیدان کړل چې د درملنې په موخه د امید په نوم روغتون کې بستر وو .
له دې ړندې بمبارۍ سره سم، یو شمېر پخوانیو چارواکو ، سیاستوالو، لوبغاړو او عامو خلکو توند غبرګونونه ښودلي او د پاکستان پوځي رژیم دغه ډول بریدونه یې د جګړې له ټولو نړیوالو قوانینو سره په ټکر کې بللي او په کلکو ټکو یې غندلي دي.
پخواني ولسمشر حامد کرزي دا بریدونه غندلي او د خبرداري په توګه یې له اسلام اباده غوښتي چې په سیمه کې د بې ثباتۍ مخنیوي لپاره دې خپلې موجود تګلارې بدلې کړي.
د پخواني ولسمشر د اعلامیې یوه برخه کې راغلي: « د پاکستان پوځي رژیم له خوا د هېواد په پلازمېنه کابل کې پر استوګنیزو سیمو او ملکي ځایونو سربېره، د روږدو کسانو د درملنې پر مرکز بریدونه شوي چې په کلکو ټکو یې غندم. زه د پاکستان پوځي رژیم ته خبرداری ورکوم چې د دغو بریدونو دوام به نه یوازې هغوی خپلو موخو ته ونه ورسوي بلکې وضعیت به نور هم د هماغه هېواد په زیان خرابه کړي.»
له دې سره همهاله، د پخلاینې عالي شورا پخوانی رییس ډاکټر عبدالله عبدالله هم پر افغان خاوره د پاکستان پوځي رژیم تېری او بمباري غندلي او د ملکيانو په نښه کول یې د جګړې له ټولو نړیوالو اصولو سره په ټکر کې بللي.
د پخلاینې عالي شورا پخواني رییس ویلي: « موږ باور لرو چې دا ستونزې یوازی د خبرو اترو او ډېپلوماټیکو چینلو له لاری حل کېدای شي.»
په دې غمیزه د پښتونخوا ګڼو مخورو پښتنو او مشرانو هم توند غبرګونونه ښودلي. د پښتون ژغورنې غورځنګ مشر ویلي، پاکستاني علما به لا هم د حیا لرلو هیله لري چې پر افغانستان د پاکستان د تېریو فتواوې یې ورکړې دي.
منظور احمد پښتین ویلي: « د پاکستان څه علماوو په هر دور کې د کابل د ورانولو فتواوې ورکړې دي؛ نور دې لږ ترلږ د دې بېګناه وګړو او په روغتون کې د پرتو مریضانو له ټوټه ټوټه جسدونه څخه حیا وکړي.
سې شنبه شپه پر ملکیانو او په کابل کې د روږدو کسانو د درملنې په روغتون د پاکستان پوځي رژيم برید د افغان لوبغاړو غبرګونونه هم پارولي.
د کرکټ ملي لوبډلې نوموتي لوبغاړي راشد خان دا بریدونه ستر جنګي جنایت بللی او له ملګرو ملتونو یې غوښتي چې د دې پېښې په اړه هر اړخیزه څېړنه او له عاملینو سره یې محاسبه وکړي.
د راشد خان د پیغام په یوه برخه کې راغلي: « د ملکي کورونو، ښوونیزو موسسو او روغتیایي بنسټونو په نښه کول، که قصدي وي او که په تېروتنه، دا یو سترجنګي جنایت دی. زه په ملګرو ملتونو او د بشري حقونو پر نورو ادارو غږ کوم چې د دې وروستي ناورین بشپړه څېړنه وکړي او عاملینو سره یې حساب وکړي.»
د راشد خان، نبي عیسې خېل او نوین الحق په ګډون، دکرکټ ملي لوبډلې ګڼو نورو لوبغاړو او ولسي وګړو هم د پاکستان پوځي رژیم وروستۍ بمباري غندلې او کړنې یې د اسراییلو له صهونیستي رژیم سره پرتله کړې دي.
له دې بریدونو وروسته اسلامي امارت خبر داری ورکړی چې پاکستاني پوځي رژیم ته به د دې بریدونو سخت ځواب ورکړي.
