Skip to content
د افغانستان د خوست ولایت سپېرې او د کونړ ولایتو پر شلتن ولسوالۍ د پاکستان د پوځي الوتکو هوايي برېدونو په غبرګونو کې د دوشنبې پر ورځ د «۱۴۰۱ کال د وري پر ۲۹ مه» په لرې پښتونخوا او د کاناډا په تورنټو ښار کې هم سلګونه کسانو لاریونونه وکړل او د دې بریدونو د وضاحت غوښتنه یې وکړه.
لاریون کونکو د لرې پښتونخوا له ولسونو وغوښتل،چې د پاکستاني پوځ له لوري دې د وزیرستان او پښتونخوا په ولسونو د وژنو په غبرګون راپورته شي او د ورته بریدونو مخنیوی دې وکړي.
ګیلامن پښتین وايي:« زموږ کور له یتیمانو ډک دی،چې مخ اړوو،د پنجاب د پوځ له لاسه زموږ کونډې او یتیمان وینو. په کوم مخ د دغه چاپير استعمار لپاره وګورو.»
اخوا دغو بریدونو په نړیواله کچه هم غبرګونونه را پارولي او د کاناډا په تورنټو ښار کې هم سلګونه افغانان د پاکستان پر ضد واټونو ته راووتل.
لاریون کونکو د پاکستاني پوځ پر ضد شعارونه ورکول او له نړیوالو یې د تر سره شوې هوايي برېدونو په اړه د څيړنو غوښتنه وکړه.
کاناډا کې افغان مهاجر غفور معروف وايي:« افغانستان هیڅکله دولتونو او حکومتونو نه ده ګټلی . پاکستانه! د یوې یوې قطره وینې پوښتنه به درنه کوو او د یوې یوې قطرې وینې انتقام به درنه اخلو ،خو وخت به یې راځي»
د پاکستاني چورلکو له لوري دوه ورځې وړاندې د خوست په سپېرې او د کونړ په شلتن ولسوالیو خونړي هوايي بریدونه وشول،چې له امله یې د ښځو او ماشومانو په ګډون له ۵۰ زیات ملکي وګړو ته مرګ ژوبله واوښته.
د پاکستاني پوځ له لوري د تر سره شویو هوايي برېدونو په غبرګون خوست او ننګرهار کې هم پراخ لاریونونه شوي او له اسلاميامارت یې غوښتنه کړې،چې د دې تیري وضاحت وغواړي.
