۳۶ کاله وړاندې د ۱۳۶۷ کال د سلواغلې پر ۲۶ مه د پخواني شوروي اتحاد لښکرې د افغان ولس د نهه کلنې مبارزې په پایله کې مات او له افغانستانه ووتل.
که څه هم په افغانستان کې د شوروي ځواکونو حضور پای ته ورسېد، خو له هغې وروسته د سیاسي ګوندونو خپل منځي جګړې پيل او په هېواد کې د لسیزو غمیزه پيل شوه.
پخوانی جهادي قوماندان محمد عارف وايي: « افغانان د هېچا اشغال نه مني، د دې ځای خلک د دین او ناموس لپاره جهاد کوي، پخوا موږ جهاد کاوه اوس یې زموږ بچي کوي.»
پخوانی جهادي قوماندان خلیل الرحمن وايي: « مجاهدینو پر شوروي فشار راوړ، اقتصاد یې ور تیکه تیکه کړ، ډېر زیات کسان یې دلته له لاسه ورکړل او مجبور شول چې ماته ومني او د افغانستان خاوره پرېږدي.»
یو شمېر پخواني جهادي قوماندانانو له شمشاد سره خبرو کې د سرو لښکرو وتل د افغانانو لپاره ویاړ او د پخواني شوروي اتحاد لپاره ستره ماتې بولي.
پخوانی جهادي قوماندان خیال محمد وايي: « د افغانستان په خاوره او خلکو کې دا شهامت موجود دی چې اسارت نه مني، د بل واکمني نه مني؛ لومړی یې څو ځله انګرېزان مات کړل، پرون روسان او نن هم امریکایان. باید ووایم، هر حکومت چې ملت ته شا کړي، هغه به سقوط کوي.»
پخوانی جهادي قوماندان توریالی منګل وايي: « په دې ورځ د افغانستان غیرتي ولس د نړۍ سوپر طاقت ته ماتې ورکړه او روسان یې له افغانستانه وتلو ته مجبور کړل. روسانه نه یوازې له افغانستانه وتلو ته اړ شول، بلکې لویه امپراتوري یې هم د افغانانو له لاسه ټوټه ټوټه شوه.»
اسلامي امارت د سلواغې ۲۶ مې په مناسبت خپره کړې اعلامیه کې دغه ورځ د هېواد د تاریخ ویاړلې ورځ بللې او ټینګار یې کړی چې پرافغانستان تېرو ۱۰۰ کالونو کې د یرغلګرو له ماتې باید په راتلونکي کې زبرځواک هېوادونه عبرت واخلي او بیا ځل د افغانستان د آزادۍ او خپلواکۍ پر وړاندې ګام پورته نه کړي.
د اسلامي امارت مرستیال ویاند حمدالله فطرت وايي: « د تیرو څه باندې ۱۰۰ کلونو له پرله پسې یرغلونو او په مقابل کې یې د جهاد له کامیابۍ باید په راتلونکي کې متجاوز جهتونه عبرت واخلي او د بیا ځل لپاره زموږ د آزادۍ او حریت پر ضد ګام پورته نه کړي. د افغانستان مسلمان او غیور خلک باید د تېر په څېر په راتلونکي کې هم د هر ډول توطيئو او دسیسو پر وړاندې بیدار و اوسي او د خپل کلک عزم او اسلامي وحدت په ساتلو سره د خپلو اسلافو لار تعقیب کړي او خپل دین، عقیده او خپلواکي وساتي.»
د پخواني شوروي سرو لښکرو له نن پوره ۴۵ کاله وړاندې پر افغانستان یرغل وکړ چې د افغان ولس له سخت مقاومت سره مخ شول.
که څه هم دغه ۹ کلنه مبارزه د سلګونه زره افغانانو د قربانۍ لامل شوه، خو د پخواني شوروي اتحاد د پاشل کېدو، په افغانستان کې د سرو لښکرو د پوځي حضور ختمېدو او سترې ماتې باندې هم پای ته ورسېده.
