پر افغانستان د پاکستان پوځي رژیم د وروستي تېري په تړاو د غبرګونونو په دوام، دا ځل د تېر جمهوري نظام یو شمېر والیانو د پاکستان پوځي رژیم تېری او بریدونه او په کې د عامو خلکو او ملکي تاسیساتو په نښه کېدل، وغندل.
دوی د سې شنبې په ورځ کابل کې د یوې ناستې په پای کې په دې اړه ګډه اعلامیه هم خپره کړه. په دې اعلامیه کې د پاکستان تېری او بریدونه د ملګرو ملتونو منشور، اسلامي او انساني اصولو خلاف عمل بلل شوی.
اعلامیه کې زیاته شوې، افغانانو د تاریخ په اوږدو کې د نړۍ زبرځواکونو ته پرېکنده ځواب ورکړی او د پاکستان تېری به هم بې ځوابه پرې نږدي. دوی د پاکستان بزدلانه تېري پر وړاندې د هېواد له دفاعي ځواکونو څخه د ملاتړ ډاډ ورکړ.
د پخواني حکومت والي صدیق پتمن وايي: « موږ د افغانستان پر هوايي او ځمکني حریم د پاکستان تېری په کلکو ټکو غندو، د ټولو انساني او نړیوالو قوانینو خلاف عمل یې بولو او ځانونه د دې وحشیانه بریدونو له قربانیانو سره په غم کې شریک بولو. همدارنګه ولس او نظام ته ډاډ ورکوو چې په هر ډول سختو حالاتو کې د دوی ترڅنګ ولاړ یو او د خپلې خاورې د دفاع په موخه، په یوه غږ د نظام او امنیتي ځواکونو ملاتړ کوو.»
د پخواني حکومت دغو والیانو په خپلو خبرو کې وویل، پاکستان د افغانستان نا امنه کولو پروژه پر مخ وړي او له عامو خلکو، دیني عالمانو، د سیاسي ګوندونو له مشرانو یې وغوښتل چې د اسلام اباد د سیاستونو ښکار نه شي.
دوی په خپله ګډه اعلامیه کې د پاکستان پوځي رژیم له خوا پر ملکي وګړو بریدونو او اوښتې مرګ ژوبلې ته هم اشاره وکړه او د بشري حقونو له نړیوالو ادارو یې وغوښتل چې اسلام اباد دې په دې اړه ځواب ویلو ته مجبور کړي.
صدیق پتمن په دې اړه وايي: « د پاکستان ولس باید پر دوی حاکمې پوځي کړۍ ته چې خپلې ګټې د افغانستان په بې ثباتۍ کې ویني، اجازه ورنه کړي چې سیمې ته داسې جګړه راوړي چې د هېچا په خیر نه ده.»
د تېر حکومت یو تن چارواکی ګل نبی احمدز وایي: « دا د دوی ناپوهي او ذلالت دی او هغه څه دي چې هېڅ ځای به ونه نیسي.»
له دې سربېره، د تېرحکومت والیانو د پاکستان د یرغل پر وړاندې د خلکو پر اتحاد ټینګار وکړ او د پخواني نظام له سیاستوالو یې د ورته دریځ خپلولو غوښتنه وکړه.
د تېر حکومت والي عبدالکریم نورستاني وايي: « دا چې د افغانستان پر حاکمیت او هوايي حریم تجاوز کېږي، خو بیا هم یو څوک د افغان په صفت د دې بریدونو ملاتړ کوي یا په ښه سترګه ورته ګوري، دا یو غیر افغاني دريځ دی.»
د تېر حکومت والي لطف الله عزیزي وايي: « د پاکستان له خوا پر افغانستان برید، تېری او تجاوز دی، د توجیه وړ نه دی او موږ یې غندو. د افغانستان د بې دفاع وګړو، ښځو او ماشومانو وژل په هېڅ صورت د توجه وړ نه دي او نه یې باید څوک توجیه کړي.»
د تېر حکومت د والیانو په اعلامیه کې دا هم ویل شوي چې افغانستان هېڅ کله هم د ګاونډ او سیمې له هېوادونو سره د جنګ پلوي نه کوي. دوی د پاکستان له سیاسي ګوندونو او دیني عالمانو غوښتي چې د دواړو هېوادونو ترمنځ د روانې جګړې پای ته رسولو لپاره هڅې وکړي.
د پاکستان پوځي رژیم له خوا دا بریدونه داسې مهال پیل شول چې د اسلامي امارت چارواکي په کابل کې د سعودي عربستان له یو پلاوي سره چې د کابل او اسلام اباد ترمنځ یې منځګړیتوب کاوه، په خبرو بوخت وو.
له دی څو ورځې وړاندې اسلامي امارت د روژې مبارکې میاشتې او د سعودي عربستان د هڅو په درناوي، له پاکستان سره تېره جګړه کې نیول شوي پاکستاني پوځیان هم خوشي کړل، خو پاکستان یې په ځواب کې د افغانستان پر ملکي وګړ او کورونو بمونه وغورځول.
