د امریکا څارګرې ادارې یا سي آی اې پخواني مشر او د دفاع وزارت پخواني وزیر لیون پنېټا د بریټانیا له ګارډین ورځپاڼې سره په تازه مرکه کې افغانستان کې د ترهګری پر پراختیا اندېښنه ښودلې او غوښتنه یې کړې،چې دلته دې د دې پدیدې مبارزه لا غښتلې شي. د امریکا پخوانی دفاع وزیر لیون پنېټا ویلي، کابل کې د القاعده مشر ایمن الظواهري وژل د دې ښکارندویي کوي،چې اسلامي امارت لا هم له دې ډلې سره نږدې اړیکې پالي.
پنېټا زیاته کړې:« کابل کې د الظواهري له وژل کېدو جوته شوه،چې طالبان لا هم له القاعده شبکې سره اړیکې لري. افغانستان کې باید د ترهګرو ځپلو هڅې لا غښتلې شي،ځکه د القاعده او داعش په څېر ډلې لا هم امریکا ته ګواښ پېښولی شي.»
دغه پخواني امریکايي چارواکي نه ده په ډاګه کړې،چې د ترهګری ضد مبارزه په افغانستان کې په کوم ډول پیل شي،خو پخواني پوځیان باور دي،چې د الظواهري تر وژل کېدو وروسته امریکا پر افغانستان هوایي څار پیل کړی دی.
پخوانی پوځي محمد رادمنش وايي:« د الظواهري له وژل کېدو وروسته امریکا دې پریکړې ته ورسیده،چې باید د ترهګر ځپلو لپاره خپل هوایي عملیات او ګزمې پیل کړي،خو د ځمکنیو عملیاتو په تړاو تر دې دمه څه نشته دي.»
ځینې نور بیا پر امریکا تور پورې کوي،چې د افغانانو امنیت او ثبات ورته اړین نه وو،ځکه خو یې د تېر افغان حکومت سلګونه زره پوځیان ناکام کړل.
د پوځي چارو شنونکی توریالی ځاځی وايي:« افغانستان کې اوسنی وضعیت د امریکا لخوا رامنځته شوی دی او دوی همدا ډول ډلې او ټپلې روزلي او تمویل کړي دي. که امریکا د افغانانو د امنیت پلوې وی،نو د افغانستان پوځ به یې د طالبانو په لاس کې نه ورکاوه. اوسني امنیتي ځواکونه د هېواد ځمکنۍ بشپړتیا او هوایي حریم نه شي ساتلی او یوازې د طالبانو د امنیت لپاره دي.»
د ترهګری ضد مبارزې بحث داسې مهال راپورته کیږي،چې اسلامي امارت تر دې دمه د د القاعده شبکې د مشر ایمن الظواهري وژل کېدل نه دي تائید کړي او کابل کې یې د امریکا هوایي برید د افغانستان په کورنیو چارو کې لاسوهنه بولي.
اسلامي امارت په کراتو ویلي،د دوحې تړون ته کلک ژمن دي او چاته به اجازه ورنه کړي،چې د افغانستان له خاورې د امریکا په ګډون نورو هېوادونه وګواښي.
