افغانستان لپاره د پاکستان ځانګړي استازي له خپل چیني سیال ژاو شینګ سره په لیدنه کې بیاځل د دواړو هېوادونو پر وړاندې د افغان خاورې کارېدنې ادعا تکرار کې.
محمدصادق خان تور پورې کړی چې د پاکستاني طالبانو تحریک(ټيټيپي) او ختیځ ترکستان اسلامي غورځنګ چې د چین حکومت ضد ډله ده، په افغانستان کې فعالیت لري.
نوموړي زیاته کړې، افغانستان لپاره د چین له ځانګړي استازي سره په دې اړه بحث او لیدنه کې له ترهګرۍ سره د مبارزې پر ضد د دوه اړخیزې همغږۍ ایجادولو او په دې برخه کې د همکارۍ پر پراخولو سلا شوي.
افغانستان لپاره د پاکستان ځانګړي استازي ویلي: « په دې لیدنه کې مو د ټيټيپي او د ختیځ ترکستان اسلامي غورځنګ د ګواښونو په تړاو چې له افغان خاورې فعالیت کوي، بحثونه وکړل او پر دې سلا شوو چې دوه اړخیزه همغږي وغځوو او د ترهګرۍ د ګواښونو پر وړاندې د مبارزې په برخه کې همکارۍ لا ژورې کړو، ترڅو په سیمه کې سوله، امنیت او ثبات خوندي پاتې شي.»
اسلامي امارت په ځلونو د نورو پر ضد د افغان خاورې کارونې ادعاوې او تورونه رد کړي او برعکس پاکستان یې د اوسني حکومت ضد وسلهوالو پر روزنې او تجهیز تورن کړی.
د پاکستان سټبلېشمنټ که څه هم د خپلو ادعاوو د اثبات لپاره د کره شواهدو په راوړلو کې پاتې راغلی، خو افغان لوري له کرښې هاغاړه د داعش خراسان ډلې د مرکزونو موجودیت په تړاو موثق ثبوته وړاندې کړي، خو له پامه غورځول شوي دي.
په دې اړه د پاکستان له بیابیا بېغورۍ او د اندېښنو له بابېزه ګڼلو وروسته، اسلامي امارت کابو یوه اوونۍ وړاندې هم د جولای په ۲۷مه د خیبر پښتونخوا په چترال سیمه کې د داعش خراسان پر مرکزونو هوايي بریدونه ترسره کړل.
ویل کیږي چې له دغو مرکزونو د افغانستان پر وړاندې د بریدونو د پلان جوړونې په توګه کار اخستل کېده او د یادې ډلې غړو په کې روزنه ترلاسه کوله.
د سیاسي چارو شنونکی اخترمحمد راسخ وايي: « واقعیت دا دی چې د پاکستان نظامیان او استخباراتي اډه د دغو ناخوالو او ترهګرو ډلو جوړولو او د افغانستان نا امنه ساتلو لپاره یې کارول د دوی سټراټیژیک عمق دی.»
له دې سربېره، د کونړ امنیه قومندان ضیا الحق حامد، تېره میاشت له شمشاد سره په مرکه کې ډیورند فرضي کرښې ته څېرمه د هغو وسلهوالو د نیولو خبر ورکړی و چې له کرښې دې غاړې ته یې د را اوښتو هڅه کوله.
د چارو شنونکي د نورو اړخونو سربېره له تخنیکي او مالي پلوه هم د داسې وسلهوالو ډلو روزنه، تجهیز او کارونه چې په لویه کچه د یوه هېواد امنیت وننګوي، په اوسنیو شرایطو کې د افغانستان له توانه بهر خبره بولي.
دوی وايي، دا امکان نه لري چې له افغانستانه ورغلې وسلهوال دې له کرښې تېر او د دویم هېواد د خاورې په عمق کې بریدونه وکړي او مخه دې ونه نیولی شي.
د سیاسي چارو شنونکی معینګل څمکنی وايي: « دوی هڅه کوي هغه ډلې هم و روزي او دلته یې راواستوي چې د افغانستان د حکومت پر وړاندې ګواښ رامنځته کوي. د اسلامي امارت امنیتي ځواکونو ډېر کله دا ډول خلک نیولي یا له منځه وړي دي.»
دا لومړی ځل نه دی چې پاکستان داسې ادعاوې کوي بلکې د دې هېواد ګڼو ملي او پوځي لوړ پوړو چارواکو تر دې وړاندې ورته څرګندونې مطرح کړې دي چې اسلامي امارت په کلکه رد او هلته روانه امنۍ یې د یاد هېواد کورنۍ مسئله بللې.
