په داسې حال کې چې د اکټوبر ۱۱ مې خیبر پښتونخوا کې د قومي عدالت لویې جرګې جوړېدو ته د تیاري هڅې روانې دي؛ تېره شپه ناوخته ګڼ شمېر پاکستاني پولیسو د قومي عدالت لپاره لګول شویو خیمو ته اور اچولی او د خوراکي توکو په ګډون یې ډېری وسایل غلا کړي دي.
د پېښې عیني کتونکي په خواله رسنیو کې وایي، پولیسو له کوم خبرداري پرته برید کړی او ډېرو کسانو ته یې مرګ ژوبله اړولې ده.
د پښتون ژغورنې غورځنګ یو غړی وايي: « د پاکستان امنیتي ځواکونو، پولیسو او پوځ زموږ په خیمو برید وکړ، خیمې یې وسوځولې او ګڼ کسان یې ژوبل کړل.»
د پښتون ژغورنې غورځنګ یو بل غړی وايي: « ملګرو ویل چې موږ به له امنیتي کسانو سره کېنو او خبرې به وکړو، خو کله چې را ورسېدل سملاسي یې برید پيل کړ او ګڼ کسان یې ژوبل کړل.»
د پښتون ژغورنې (پي ټي اېم) غورځنګ مشر منظور احمد پښتین په خپله ایکسپاڼه لیکلي، د پولیسو له لوري دا ډول کړنې یې د پښتنو د عدالت لپاره د پلان شوې جرګې په ترسره کولو کې خنډ نه شي جوړولی او له ځوانانو یې غوښتي چې یادې سیمې ته له بسترو او د اړتیا وړ لومړنیو توکو سره لاړ شي.
منظور احمد پښتین زیاته کړې: « شپې ناوخته په انتظامي جرګې کمپ باندې برید کې د ملګرو خېمې سوځول شوې، د اړتیا وړ سامان د پېښور پولیسو وړی؛ خو میدان اوس هم زموږ په واک کې دی. د ولسونو او مشرانو ننګ ته سلام چې په نیمه شپه هم ګراونډ ته راغلل، دلته ټولو ځوانانو ته وایو چې نن د ننګ ورځ ده، له بسترو او د اړتیا وړ سامان سره میدان ته راشئ. که د نړۍ ټول طاقتونه سره یوځای شي او د جرګې ناکامولو هڅه وکړي، د الله (ج) په فضل سره به د پښتنو جرګه ترې کوو.»
آزاد خبریال جعفر زکوړی وايي: « د پښتوخوا پولیسو د شپې په ۲ بجو برید کړی. په دې برید کې د پي.ټي.اېم زیات شمېر ملګري د اوښلن ګاز له امله ژوبل شوي او روغتون ته لېږدول شوي. د پښتونخوا اعلی وزیر امین ګنډاپور له منظور پښتین سره کتلي او هغه ته یې په جرګه کې د ګډون بلنه ورکړې.»
د پښتون ژغورنې غورځنګ یو شمېر نور غړي بیا وایي، له هغې راهیسې چې منظور پښتین د دې غونډې اعلان کړی، د پاکستاني ځواکونوله لوري د علي وزیر په ګډون د پي ټي اېم ډېر نورغړي په بېلابېلو پلمو نیول شوي. د دوی په خبره، د ریاست دغه ډول هڅې شرمناکې دي او د پرمختګ مخه نه شي نیولی.
د پښتون ژغورنې غورځنګ د جنوبي پښتونخوا مشر نور باچا وايي: « څرنګه چې د هرې ورځې په تېرېدو جرګه را نیږدې کېږي، ریاست لګیا دی ناکامې هڅې یې پيل کړې او د جرګې د مخنیوي هڅې کوي. تېر ماښام یې په خیبر کې د جرګې پر خېمو برید کړی او زموږ ملګري یې ژوبل کړي او نیولي دي. موږ ریاست ته واضېح ځواب ورکوو، که هر څومره مزاحمت وکړی، دا جرګه به ترسره کېږي.»
دا په داسې حال کې ده چې له مودو راهیسې د یاد غورځنګ غړي او نورسلګونه پښتانه په ناڅرګندو وسله والو بریدونو کې په نښه او وژل کېږي؛ خو پي ټي اېم له لوري د دې غورځنګ د غړو او ټولو پښتنو د وژنې ګوته د پاکستان امنیتي اداروته نیول کېږي.
د روان کال د جولای په دوولسمه، د پښتون ژغورنې غورځنګ مشر منظور پښتین د اکتوبر په ۱۱ مه د پښتنو قومي عدالت جرګې د جوړېدو خبر د یاد غورځنګ د مخکښ غړي ګیله من وزیر د جنازې په مراسمو کې ورکړ.
