له پاکستان او خیبرپښتونخوا څخه د افغان کډوالو ایستلو په لړ کې تازه پاکستاني پولیسو د خیبر پښتونخوا په صوابۍ کې د کوهاټي کمپ اوسېدونکو افغانانو ته ګواښ کړی چې ژر تر ژره کمپ خالي او خپل هېواد ته ستانه شي.
هلته مېشت کډوال وايي، پولیسو ورسره چلن څو برابره تریخ کړی او د ګوهاټي کمپ ټولو دوکانونو په وتړلو سره يې ورته ګواښ کړی چې د اوسېدو مهلت يې پوره شوی او ژر دې له دې ځایه لاړ شي.
په پاکستان کې دېره افغان کډوال مجاهد شینوای وايي: « افغان مهاجرین په پاکستان کې له ډېر سخت وضعیت سره مخ دي. د روژې په میاشت کې د دوی هغه محلي بازارونه هم ور تړل شوي چې د کمپونو په داخل کې یې جوړ کړي وو. دلته هغه ورځ افغان کډوال نیول کېږي، لومړی زندان او بیا له هغه ځایه افغانستان ته اړول کېږي.»
د راپورونو له مخې، دا مهال په کوهاټي کمپ کې شاوخوا۲۰زره کسان اوسي چې ډېری يې افغانان دي. د دې کمپ افغان اوسېدونکو له ځايي چارواکو غوښتي چې د کاروبارونو د تصفيې لپاره دې د اختر تر دريمې پورې وخت ورکړي.
شنونکي د جبري اخراج له امله په افغانستان کې بشري فشار مني او وايي، دا فشار له دې امله دی چې ډېری راستنېدونکې کورنۍ سرپناه او د مېشتېدنې لومړني امکانات نه لرل.
د سیاسي چارو شنونکی احمدخان اندړ وايي: « د پاکستان حکومت په ډېر ظلم سره هلته مېشت افغانان له هېڅ راز ملاحظې پرته افغانستان ته استوي. دوی له افغانانو خپل جایدادونه ګرځوي، پیسې او قېمتي ګاڼې ترې اخلي او بیا یې افغانستان ته اړوي. دوی غواړي له دې لارې پر اسلامي امارت فشار راوړي، ځکه دوی پوهېږي چې کله په ډېره کچه کډوال راستانه کړي، دلته اقتصادي فشارونه زیاتېږي او ښايي بشري ناورین رامنځته شي.»
د چارو شنونکی محمد اسماعیل ځدراڼ وايي: « زه فکر کوم پاکستان د هغو پالیسیو ښکار شوی چې دوی د خپلو ګاونډیو هېوادونو د نا امنه کولو لپاره جوړې کړې دي.»
د کډوالو او راستنېدونکو چارو وزارت په دې اړه تازه څه نه وايي، خو وړاندې يې ويلي چې له پاکستان او خيبرپښتونخوا د افغانان کډوالو جبري اخراج له پيل راهيسې يې ميليونونه راستنو شویو افغانانو ته د مېشتېدنې اسانتياوې برابرې کړې دي.
