د جولای له لسمې نېټې راهیسې پاکستان د افغان کډوالو د نیولو او افغانستان ته د جبري شړلو پراخ عملیات پیل کړي دي.
د پاکستان حکومت د افغان کډوالو د ایستلو په روان بهیر کې هغه ۱۳ زده کړیالان هم نیولي چې د طبي تخصصي زده کړولو لپاره دې هېواد ته ورغلي وو .
دغه زده کړیالان وايي، نږدې یو کال وړاندې یې د وېزو تمدید او یا نویو وېزو ترلاسه کولو لپاره غوښتلیکونه سپارلي، خو په اړه یې لا هم ځواب نه دی ترلاسه کړی.
د دوی په خبره، دوی د رسمي تحصیلي بورسونو له لارې پاکستان ته راغلي، خو د دې هېواد حکومت یې له افغانستان سره د سیاسي مخالفت له امله ځوروي او د وېزو تمدید یې ورته ځنډولی دی.
افغان محصل احمد جاوید نصرت یار وايي: « له افغانستان څخه ګڼو ډاکټرانو له بېلابېلو لارو او ازموینو څخه د پاکستان تخصصي برنامو ته لاره پیدا کړې، خو له هغه راهیسې چې د افغانستان او پاکستان ترمنځ اړیکې خرابې شوې، د هغو ډاکټرانو وېزې نه غځول کېږي چې له وخت څخه تېرې شوې دي.»
د ۱۳ افغان زده کړیالانو پر وړاندې د پاکستاني حکومت وروستی ناسم چلن داسې مهال رامنځته کېږي چې یوازې یوه اوونۍ وړاندې د دې هېواد په پنجاب ایالات کې پولیسو دوه افغان ډاکټران او شاوخوا شل افغان زده کړیالان چې په طب برخه کې یې زده کړې کولې، هم ونیول .
افغان محصل په دې اړه وايي: « تېره شپه له بهاولپور څخه ۱۰ تنه افغان ډاکټران له ټرېننګ څخه و ایستل شول . همدارنګه د سایوال په زېله کې هم څلور تنه ډاکټران چې په بېلابېلو څانګو کې په تخصص باندې بوخت وو، د ټرېننګ د بندولو امر ورته شوی او روغتون یا لیلیې ته د ورتګ اجازه نه ورکول کېږي.»
د کډوالۍ چارو فعالان وايي، له هغو زده کړیالانو سره ناقانونه چلن چې د اوسېدونې اسناد یې تر اروزنې لاندې وي، د نړیوالو بشري قوانینو هغه اصول تر پښولاندې کوي چې حکومتونه یې په اړه ژمنتیا لري .
د چارو شنونکی عزیز معارج وايي: « له بده مرغه پاکستاني چارواکي د افغانانو په تړاو هېڅ ډول اصول او قوانین نه رعایتوي. دوی هغه محصلین هم نیسي چې دوی خپله وېزه ورکړې او ور غوښتي یې دي. که موږ ووایو چې دا کار د اصولو خلاف دی، دوی اصول نه مني، ځکه دوی د غربي نړۍ له ملاتړ برخمن دي.»
په وروستیو میاشتو کې پاکستان د بې اسنادو افغان کډوالو، د نیولو او جبري ایستلو لړۍ چټکه کړې او د اخراج په روان بهیر کې یې هغه زده کوونکي، زده کړیالان او ډاکټران هم شامل دي چې د قانونې پروسې له لارې دې هېواد ته د زده کړو او یا هم تخصص لپاره ورغلي.
