پاکستاني چارواکو له شاوخوا دوو کلونو راهیسې د افغان کډوالو د جبري ایستلو لړۍ پيل کړې او په یاده موده کې يې سلګونه زره کورنۍ په زور او جبر افغانستان ته ستنې کړې دي.
د پاکستان حکومت تر ټولو نوې پرېکړه کې د روانې مارچ میاشتې۳۰ نېټه افغان کډوالو ته د وروستي ضرب الاجل په توګه ټاکلې او جدي اخطار یې ورکړی چې باید له دې هېواده ووځي.
د دې پرېکړې په غبرګون کې د د دې هېواد د پارلمان غړي نيوکه کوي چې د پاکستان چارواکي د افغان کډوالو پر وړاندې غیر انساني چلن کوي او په پاکستان کې یې د دوی ژوند سخت کړی.
د پاکستان د پارلمان غړی شېر افضل مروت وايي:« د پاکستان حکومت انسانیت تر پښو لاندې کړی او په دې هېواد کې یې د افغانانو اوسېدل حرام کړي. هغوی د افغان کډوالو په سر یوه جریمه هم ټاکلې چې له مخې به یې هر افغان له ۵۰ زرو نیولې تر ۱۰۰ زرو کلدارو جریمه ورکوي؛ د افغانانو پر وړاندې لویه بې انصافي او ظلم دی. موږ په لوی لاس هڅه کوو چې له خپلو ګاونډیو سره اړېکې ترېنګلې کړو او دا چاره د پاکستان پر ګټه نه ده.»
په ورته مهال، د سیاسي چارو شنونکي وايي، پاکستان دې د افغان کډوالو له مجبوریت ګټه نه پورته کوي او په خبره يې وخت دې ورکړي چې په خپله خوښه له دې هېواده افغانستان ته ستانه شي.
د سیاسي چارو شنونکی توریالی ځاځی وايي: « ملګري ملتونو او د نړۍ هېوادونه ورته ګوري او ویني چې پاکستان له افغان کډوالو سره کوم ناوړه جنایتونه کوي او دا هرڅه د نړیوالو کنوانسیونونو په خلاف دي. زما پوښتنه دا ده چې نړۍ ولې په دې هرڅه سترګې پټوي؟ د افغانستان حکومت باید د یوه قاطع اقدام په توګه کابل کې د پاکستان سفارت وتړي.»
بله خوا په پاکستان کې مېشت افغان کډوال وايي، د پاکستاني چارواکو وروستۍ پرېکړې له سختې رواني شکنجې سره مخ کړي او زياتوي چې د اختر په دې شپو ورځو کې د نيول کېدو له ويرې ښار ته نه شي وتلی.
په پاکستان کې دېره کډوال مجاهد شينواری وايي: « دا چې د پاکستان د حکومت له خوا ټاکل شوې نېټې ته ډېرې کمې ورځې پاتې دي، دلته شته مهاجران سخت اندېښمن دي. اختر ته خو ورځې پاتې دي، خو زموږ خلک حتا د روژه ماتي په برابرولو کې هم ستونزې لري. افغان مهاجرین نه شي کولی بازارونو ته لاړ شی، خو اوس نه شي کولی د اختر لپاره چمتوالی هم وکړي.»
پاکستان کې مېشت افغان کډوال له سرپرست حکومت او پاکستان غوښتنه کوي چې د دوی پر وړاندې دې روان ناوړه وضیعت ودروي او افغانانو ته دې وخت ورکړي چې په خپله خوښه له هېواد ته ستانه شي.
