علي وزیر او د پارلمان یو بل غړی خورشید شاه د پارلمان د مشر اسد قیصر په امر له بنده خوشې شوي، ترڅو د بودجې په اړه په غونډو کې ګډون او خبرې وکړي.
د پاکستان په قوانینو کې د پارلمان مشر د ځانګړو شرایطو پر اساس له بنده د پارلمان غړو د پرېښودلو امر ورکولای شي.
د پښتون ژغورنې غورځنګ مشر منظور احمد پښتین، د پارلمان غړی محسن داوړ او ګڼ نور کسان د علي وزیر د هرکلي لپاره د اسلام اباد هوایي ډګر ته ورغلي ول.
وزیر د پاکستان پارلمان غړی او د پي ټي ایم یا پښتون ژغورنې غورځنګ یو له مخکښو غړو دی.
هغه د تېر کال له ډیسمبر راهیسې د حکومت پرخلاف د خلکو د پارونې په تور په کراچۍ کې بندي وه.
