پاسپورټ ریاست: هره ورځ ۸ زره پاسپورټونه وېشل کېږي 

د پاسپورټ مشر عالم ګل حقاني،چې پکتیا ولایت ته په سفر تللی وايي، اوس هره ورځ په پلازمېنه کابل او ولایتونو کې  اته زره کسانو ته پاسپورټونه وېشل کېږي او هڅه دا ده،چې د خلکو غوښتنو ته په کتو دغه شمیر لا ډېر شي.

 حقاني زیاته کړه:« ولایتونو کې چې کار پیل شو.هر ولایت کې تر دوو سوو پاسپورټونه ویشل کیږي ، دری څلور زرو ته رسېږي او له مرکز سره هره ورځ اته زره کسانو ته پاسپورټونه وېشو.»

په ورته وخت کې حقاني له خلکو وغوښتل،چې کمیشن کارانو ته دې پیسې نه ورکوي.

حقاني زیاتوي، د کمیشن کارانو نیول یې پیل کړي او هغو کسانو ته پاسپورټونه  نه وېشل کېږي،چې کمیشنکارانو ته پیسې ورکوي. 

حقاني زیاتوي:« موږ کمیشن کاران نیسو،د قانون منګولو ته یې سپارو، که چیرته چا کمیشن کار ته پیسې ورکړې، څېړنه یې کېږي نوم یې تور لیست کې لیکل کېږي او هېڅکله به هم پاسپورټ تر لاسه نه کړي.»

حقاني وايي، پلازمینه کابل او ولایتونو کې د بای میټیریک او ځنې نور وسایل له کاره لویدلي او نږدې ورځو کې به نور راوړل شي او په دې سره به وکړی شي،چې د خلکو غوښتنو ته ځواب ووایي.

هغه وايي:« پلازمېنه کابل او ولایتونو کې د بای میټریک او ځنې نور وسایل له کاره لویدلي دي. په  نږدې ورځو کې به نور راورسېږي او د پاسپورټونو د ویش ټولو مرکونو ته به یې ولېږو.»

مراجعینو د پاسپورت له مشر علم ګل حقاني غوښتنه وکړه،چې په ټولییز ډول دې د کارکوونکو شمیر زیات کړي او ښځینه کار کوونکو ته دې اجازه ورکړل شي،چې د ښځو اړوند چارې ترسره کړي.