امیري زیاته کړې:« هغوی چې له یوه افراطي افغانستانه وېره لري باید د ښځو او نجونو پر وړاندې د طالبانو له تګلارو خبر وي. د دوی د زده کړو، په ډېرو سکتورونو کې د کار کولو، ان کوچنۍ خوښۍ لکه پارک ته د تګ څخه انکار کوي. دا افراطیت به د بې ثباتۍ، بې وزلۍ او د زیات نفوس د تښتې لامل شي.»
د افغانستان لپاره د امریکا سفارت شارژدافیرې کرن ډیکر دا پرېکړه د افغان ښځو، ماشومانو او ټول ولس لپاره سخته بللې او په خبره یې بدې پایلې به ولري.
ډیکر زیاتوي:« داسې راپورونه مې اوریدلي،چې ګواکې افغانستان کې ښځې پارکونو ته له تګ منع شوې دي. که دا خبره حقیقت ولري،نو هېڅ د منلو وړ نه ده. ښځې هم د نارینه وو په شان پارک ته د تګ حق لري. سربېره پر دې، دوی د ټولنې هغه قشر دی،چې ماشومان رالویوي او دا د هغوی حق دی،چې د تفریح او تازه هوا اخېستلو لپاره پارک ته ولاړې شي. دا د ښځو ، ماشومانو او د ټول افغانستان لپاره یوه بده پریکړه ده.»
د امربالمعروف او نهې عن المنکر وزارت ویاند محمد صادق عاکف بیا وايي،د پارکونو مسوولینو او ښځو د دوی له لورې ورکړل شوې سپارښتنې نه عملي کولې، ځکه خو یې پر وړاندې دا ډول پرېکړه وکړه.
د ياد وزارت د مالوماتو له مخې،پرېکړه یې د اوس له پاره د تطبیق وړ ده او معلومه نه ده، چې ښځې به بیا کله وکولای شي پارکونو ته د تګ اجازه ولري.
