Skip to content
د افغانستان ټولګټو چارو وزارت سرپرست وزیر مولوي بخت الرحمان شرافت وايي، د نوي کال په پيل کې به د هېواد د لویو لارو بیا رغولو چارې پيل کړي او پر وینا یې د دې کار لپاره کافي اندازه بودیجه هم لري.
شرافت زیاته :« موږ سروې کړې،پر دغو لویو لارو په هرو ۲۴ساعتونو کې، موږ ټولې داخلي منابع مطالعه کړي. ان شاء الله راتلونکي پسرلي کې به د هېواد پر ټولو لویو لارو وران شوي پلچکونه او خراب شوي سړکونو د جوړولو چارې پیل شي.»
د کابل – کندهار لویه لاره، یوه له هغو ده،چې په تېرو شلو کالو کې د جګړې له امله پر دې غځېدلې لاره سلګونه لوی پلونه او پلچکونه کنډ او کپر شوي دي.
پر یادې لارې تلوونکي مسافر د اسلامي امارت له حکومته غواړي،چې د لویو لارو رغول په اساسي ډول ترسره کړي.
د کابل – کندهار لویې لارې یو مسافر وايي:« دا ډېره لویه ستونزه ده،کوم پلونه او پُلچکونه چې خراب شوي، موږ يې له ډېرو ستونزو سره مخ کړي یو.غوښتنه مو دا ده،چې د لارې په اوږودو کې ټول ویجاړ شوي پلونه بېرته ورغول شي.»
د کابل – کندهار لویې لارې یو بل مسافر میر حمزه وايي:«موږد اسلامي امارت له مسوولینو غواړو،چې د کابل کندهار لویه لاره دې بیرته پر اساسي ډول جوړه شي.»
په تېر شلو کالونو کې جګړو او ځمکني ماینونو د هېواد پر لویو لارو سلګونه لوی پلونه او پلچکونه وېجاړ کړي، چې له امله یې اوس مسافر او موټر چلوونکي له سختو ستونزو سره مخ دي.
