د امریکا ولسمشر ډونالډ ټرمپ یو ځل بیا د بګرام هوایي ډګر پرېښودو له امله پر مخکېني ولسمشر جوبایډن سختې نیوکې کړې او د نوموړي پالیسيو په ناکامه بللو سره يې ويلي، د بایډن پالیسۍ د دې سبب شوې چې امریکا د بګرام په څېر لوی او مهم هوايي ډګر له لاسه ورکړي.
د نوموړي په خبره، امریکا باید د چین لپاره هم د بګرام هوایي ډګر له لاسه نه وای ورکړی.
ټرمپ دا څرګندونې په کانګرېس کې د جمهوري غوښتونکو ملي کمېټې په ناسته کې کړې.
نوموړي په خپلو خبرو کې له افغانستانه د امریکايي ځواکونو د وتلو یادونه هم کړې او دا پرېکړه یې د امریکا په تاریخ کې یوه له شرمه ډکو پرېکړو ګڼلې.
ټرمپ زیاته کړې:« په افغانستان کې چې څه پيښ شول، باید نه وای پېښ شوي. دا زموږ په تاریخ کې یوه شرموونکې پېښه وه چې رامنځته شوه. خبره یوازې له افغانستانه د وتلو نه ده، بلکې هلته موږ ډېر څه له لاسه ورکړل. که زه وای، نو د بګرام هوایي ډګر مې له لاسه نه ورکاوه؛ ځکه هغه ډګر په نړۍ کې یو له لويو هوايي ډګرونو دی او بل د بګرام هوایي ډګر له چین یوازې يو ساعت لرې واټن لري. تاسې اوس پوهېږئ چې هغه مهم پوځي ډګر د چین تر واک لاندې دی او دا هرڅه د احمق جوبایډن له لاسه وشول.»
ټرمپ ویلي، ده هم غوښتل له افغانستانه امریکایي ځواکونه وباسي، خو په خبره يې د امریکا د ګټو خوندي کولو لپاره یې سټراټیژیک پلانونه هم په پام کې نیولي وو.
څو ورځې وړاندې داسې ګنګوسې خپرې شوې چې ګواکي د بګرام په هوایي ډګر کې یوې امریکایي الوتکې ناسته کړې، خو د سرپرست حکومت له خوا په کلکه رد شول.
د سیاسي چارو څارونکي بیا وایي، امریکا لاهم هڅه کوي چې د سیمه ييزو قدرتونو پر وړاندې یو مهم او سټراټیژیک ځای پیدا کړي.
د سیاسي چارو شنونکی معین ګل څمکنی وايي: « موږ له امریکا سره د اړیکو جوړولو ته اړتیا لرو؛ ځکه امریکا په نړۍ کې لومړی درجه هېواد دی. که چېرې د متوازن، بې طرفه او اقتصاد محوره سیاست پالیسي تعقیب کړو، امکان لري چې موږ له دوی سره اړیکې جوړې کړو او د توافق په لرلو سره یوې نتیجې ته ورسېږو.»
د امریکا ولسمشر ډوڼالډ ټرمپ د تېرې فبرورۍ میاشتې پر ۳مه نېټه هم د بګرام هوایي ډګر د امریکا لپاره خورا ارزښتمن بللی و او ویلي يې و چې د افغانستان دغه ستراتيژیکه اډه اوس مهال د چین په اختیار کې ده.
د سیاسي چارو یو شمېر نور څارونکي بیا وایي، د بګرام هوایي ډګر له هره اړخه د امریکا لپاره مهم او د لویو سیاسي ګټو اساسي ټکی دی.
د سیاسي چارو شنونکی نجیب الرحمن شمال وايي: « امریکا نه غواړي افغانستان په سیمه کې د یوه ستراتیژيک ټکي په توګه له یاده وباسي. له همدې امله دوی حاضر نه دي چې افغانستان خپلو رقیبانو یانې چین او روس ته پرېږدي. د امریکا ولسمشر ډونالډ ټرمپ په مختلفو بهانو، کله د بګرام هوايي اډې د بېرته نیولو او کله هم له افغانستانه د پاتې شویو او تجهیزاتو د اخیستلو په بهانه خبرې کوي.»
بګرام هوايي اډه نږدې ۶۰ کاله مخکې د افغانستان د پخواني پادشاه محمد ظاهرشاه د واکمنۍ پرمهال جوړه شوه.
دغه هوايي اډه اوس مهال د هغه وخت پنځه برابره پراخه او د سیمې پر کچه په عصري امکاناتو سمبال شوې ده.
د کابل ګاونډي پروان ولایت کې پرته بګرام هوایي اډه د افغانستان تر ټولو مجهز هوایي ډګر هم ګڼل کېږي چې په کې د هر ډول الوتکو کېناستلو وړتیا شته.
