د امریکا په امنیتي سکټور کې تر ټولو ګرم بحثونه اوس له افغانستان څخه د امریکايي ځواکونو د وتو په اړه دي.
که څه هم امریکا له طالبانو سره په هوکړه کې د خپلو ځواکونو د وتلو مهالوېش روښانه کړی، خو داسې ښکاري چې د ټرمپ اداره په دې برخه کې بېړه لري.
د امریکا لوی درستیز ویلي چې دوی له افغانستان څخه د خپلو سرتېرو د وتو طرحه برابره کړی، چې په تړاو به یې وروستۍ پرېکړه ټرمپ کوي.
د امریکا د پوځ لوی درستیز مارک میلي وایي، (موږ په افغانستان کې د عسکرو کمولو مسوولیت او پلان لرو او دا پلان له ولسمشر ټرمپ سره شریک شوی دی. خو زه نشم ویلی چې زموږ څومره عسکر به هلته پاتې کیږي ځکه وروستی پریکړه به ولسمشر ټرمپ کوي.)
له افغانستان څخه د امریکايي او ناټو ځواکونو په وتلو کې پر بېړه نیوکې هم دي او دا کار غیر مسولانه بلل کېږي.
خو امریکايي چارواکي بیا وايي، دوی د افغانستان جګړه په مسولانه ډول پای ته رسوي.
مارک میلي زیاتوي، (په افغانستان کې د عسکرو کمښت هلته په وضیعت پورې تړلی دی او زه هیله من یم چې ددې وضیعت ارزولو په موخه موږ ناستې ولرو. مهمه موضوع دا ده چې موږ غواړو د افغانستان جګړه په مسوولانه توګه پای ته ورسوو.)
د مالوماتو له مخې، دا مهال د امریکايي ځواکونو شمېر څلور زرو ته را کم شوی چې په سویل، ختیځ، مرکزي ولایتونو او د باګرام د لویې اډې له یوې برخې څخه یې خپل پوځیان او تجهیزات اېستلی دي.
په افغانستان کې د امریکايي ځواکونو تر څنګ ناټو هم ماموریت لري چې د ناټو د غړو هېوادونو شمېر دا مهال له لس زرو پورته دی، خو ناټو تر اوسه روښانه کړې نه ده چې دوی به څه وخت له افغانستان څخه وځي.
