د امریکا ولسمشر ډونالډ ټرمپ وايي، د سولې هوکړې وروسته به خپل سرتیري له افغانستانه وباسي.
دامریکا ولسمشر ډنالډ ټرمپ ویلي که له طالبانو سره د سولې هوکړه وشي خپل سرتیري به له افغانستانه وباسي.
ټرمپ تېره ورځ په واشنګټن کې ویلي چې د افغان سولې خبرې جدي پيل شوي او ښیې روانې دي.
ټرمپ ویلي، امریکا نږدې ۱۹ کلونو راهیسې په افغانستان کې ده او په لومړي ځل د سولې هوکړې په تړاو خبرې پيل شوي.
د امریکا ولسمشر د خپلې بهرنۍ پالیسۍ پر بنسټ دا کار ښه اقدام بللی دی.
ټرمپ له دې وړاندې هم ویلي و چې له افغانستانه خپل پوځیان باسي چې د دغه څرګندونې یې له ډول ډول غبرګونونو سره مخامخ شوې.
د امریکا سنا مجلس هغه لایحه تصویب کړې چې له افغانستان او سوریې څخه د امریکايي ځواکونو د وتلو مخنیوی کوي.
په لایحه کې راغلي چې سوریه او افغانستان کې لا هم افراطي اسلام پالې ډلې فعالې دي او دا د امریکا لپاره یو ګواښ ګڼل کېږي.
لایحه کې یادونه شوې چې له لازمو اقداماتو پرته د بهرنیو ځواکونو بې وخته وتل، نه یوازې سیمه بې ثباته کولای شي، بلکې داسې یوه تشه به رامنځته کړي چې په وینا یې ایران او روسیه به یې د ډکولو هڅې وکړي.
د امریکا سنا مجلس د امریکا پر حکومت غږ کړی چې په افغانستان کې د زیات شمېر ځواکونو د اېستلو له هرې پریکړې مخکې دې داسې شرایط رامنځته کړي چې د افراطي ډلو قطعي ماتې باوري کړي.
امریکا اوس مهال په افغانستان کې شاوخوا ۱۴ زره سرتېري لري چې تر ډېره د افغان ځواکونو ملاتړ کوي.
