امریکا په افغانستان کې د خپلو سرتېرو شمېر کموي، خو استخباراتي حضور پیاوړی کوي.
د امریکا ولسمشر ډانلډ ټرمپ ویلي، امریکا غواړي په افغانستان کې د خپلو سرتېرو شمېر له ۱۳زرو راکم کړي، خو یو اغېزمن استخباراتي ځواک به هلته پرېږدي.
ډانلډ ترمپ ویلي، افغانستان کې د امریکا د حضور لامل دا دی چې افغانستان د ترهګرو په لابراتوار بدل نه شي او په وینا یې راتلونکو اونیو کې به ډېر ښه کارونه ترسره او اعلان شي.
ټرمپ ویلي، کولی شي له لږ پوځي ځواک سره وضعیت تر خپل کنټرول لاندې وساتي او د افغانستان راتلونکې په طالبانو او افغان حکومت پورې اړه لري.
خو هغه ویلي، یوه مسئله باید روښانه شي، او هغه دا چې امریکا به په افغانستان کې اغیزمن استخباراتي حضور ولري.
د ارګ غبرګون
ارګ د ډونالډ ټرمپ د هغه خبرو په غبرګون کې چې ویلي یې دي، له افغانستانه د بهرنیو ځواکونو له احتمالي وتلو وروسته به په دغه هېواد کې استخباراتي حضور ولري، ویلي، افغانستان کې د بهرنیو ځواکونو شتون په شرایطو او وضعیت پورې تړلی دی.
ولسمشرۍ ماڼۍ ویلي، له امریکا سره به د سولې بحثونه په داسې لارو چارو پر مخ وړي چې په وینا یې افغانستان بیا د طالبانو لپاره په خوندي ځای بدل نه شي.
ارګ ویلي، سوله باید په دې مانا وي چې افغانستان د طالبانو او ترورېستانو په مرکز یا پټنځای بدل نه شي چې افغانستان، امریکا او غرب وګواښي.
حکومت ویلي، هدف یې دا دی چې امریکا او افغانستان یوځای دي څو له دغې پروسې سره په تدبیر پرمخ لاړ شي او د بهرنیو ځواکونو حضور به د شرایطو په اساس وي او په شرایطو او وضعیت پورې اړه لري.
بل پلو ایران ویلي، افغانستان کې د امریکا نظامي شتون هېڅ ګټه نه ده کړې او نه یې لري.
د ایران ولسمشر حسن روحاني ویلي، د سیمې هېوادونو کې د بهرنیو هېوادونو نظامي شتون ستونزې زېږوي، نا امني رامنځته کوي او هغوی د خپلو ګتو په لټه کې دي.
حسن روحاني ویلي، د امریکا نظامي شتون د افغانستان امنیت او ثبات ته هېڅ ګټه نه ده کړې او په وینا یې امریکا د خپلو ګتو لپاره په سیمه کې نا امني رامنځته کوي.
روحاني ویلي، افغانستان کې د افغانانو او د هغوی له استازو پرته د سولې خبرې هېڅ ګټه نه لري او که داسې سوله وشي، نو هېڅ دوام به پیدا نه کړي.
