د امریکا ولسمشر ډونالډ ټرمپ کرار کرار د خپلې هغې ژمنې عملي کولو ته نږدې کېږي چې له افغاستان څخه یې د سرتیرو د وتلو په اړه کړې وه.
ټرمپ تازه په خپل ټوېټر پاڼه اعلان کړی چې په افغانستان کې پاتې سرتیري به تر کرسمس پورې یعنې دوه میاشتې وروسته خپل کور ستانه کړي.
ټرمپ لیکلي: ((موږ بايد تر کرسمس پورې پاتې لږ شمېر زړور سرتېري، چې افغانستان کې خدمت کوي کور ته را ستانه کړو.))
کله چې ټرمپ واک ته ورسېد، په افغانستان د دوی د عسکرو شمېر له لس زرو زیات وه، خو اوس دغه شمېره له نیمايي هم کمه ده.
امریکا له طالبانو سره په کړې توافقنامه کې ژمنه کړې وه چې په څوارلس میاشتو کې به خپل ټول سرتیري له افغانستان څخه وباسي، خو اوس داسې ښکاري چې له هغې وړاندې وتلو ته تلوار لري.
طالبانو بیا د امریکا د ولسمشر د دې اقدام هرکلی کړی دی.
د طالبانو ویاند ذبیح الله مجاهد وایي، ((اسلامي امارت د دغه اعلان هر کلی کوي او دا اقدام د اسلامي امارت او امریکا تر منځ د توافقنامې د عملي کولو په کار کې خورا مثبت ګام بولي.))
بهرني ځواکونه اوس عملیاتي ماموریت نلري او له افغان ځواکونو سره د روزنې او تجهیز په برخه کې مرسته کوي.
د امریکايي ځواکونو د عسکرو شمېر دا مهال له پنځو زرو کم ښودل کېږي، خو د ناټو په چوکاټ کې ۳۷ هېوادونه کابو ۸۰۰۰ ځواکونه لري چې تر ټولو ډېر د جرمني ۱۳۰۰ او تر ټولو کم د لوکسامبورګ هېواد دي.
