د ټاکنو کمېسیون د ولسي جرګې لپاره د پنځو ولایتونو لومړنۍ پایلې اعلان کړې.
د ټاکنو کمېسیون رئیس ګلاجان عبدالبدیع صیاد ویلي، په دې ولایتونو کې فراه، بامیان، دایکندي، ارزګان او جوزجان شامل دي.
صیاد ویلي، په راتلونکو څو ورځو کې به د یو شمېر نورو ولایتونو پایلې هم اعلان کړي.
د راپورونو له مخې، په دایکندي کې سید محمد داود ناصری، ریحانه آزاد، علي اکبر جمشیدي او شیرین محسني ولسي جرګې ته بریالي شوي، له فراه ولایت څخه همایون شهیدزاده، عبدالستار حسیني، عبدالنصیر فراهي، عبدالجلیل بختور او بلقیس روشن په لومړنیو پایلو کې بریالي ښودل شوي دي.
دغه راز له ارزګان څخه بسم الله جان محمد، قدرت الله او انوشه بارکزۍ، له جوزجان ولایت څخه حاجي باتور دوستم، بکتاش ایشچي، محمد کریم جوزجاني، عزیزالله الفتي او حلیمه صدف کریمي راغلي او له بامیانو ولایت څخه بیا رحیم علي یار، ظهیرالدین جان آقا، سید محمد جمال بهشتي فکوري او نیکبخت فهیمي هغه کسان دي چې په لومړنیو پایلو کې بریالي اعلان شوي دي.
ولسمشریزې ټاکنې
تر راتلونکې اوونۍ به د ولسمشریزو ټاکنو مهالوېش اعلان شي.
د ټاکنو کمېسيون مشر ګلاجان عبد البدیع صیاد ويلي، تر راتلونکې اوونۍ به د ولسمشرۍ د ټاکنو مهالوېش اعلان کړي.
صیاد وویل، له هغې وروسته چې له اړوندو ارګاونو سره د بودیجې، تخنیکي او عملیاتي مسئلو په اړه سلامشورې وکړي، نو راتلونکې اوونۍ به هغه مهالوېش هم له خلکو سره شریک کړي.
ټاکل شوې چې ولسمشریزې ټاکنې د راتلونکي ۹۸ کال د حمل میاشتې په ۳۱ مه ترسره شي.
