ټاکنو کمیسیون: خلک دې زموږ خپلواکۍ ته احترام وکړي.
ټاکنو کمېسیون له سیاسیونو او خلکو غواړي چې پر ټاکنیزو کمېسیونونو د فشار پر ځای، له دوی سره همکاري وکړي او د کمېسیون خپلواکۍ ته احترام ولري.
دغه کمېسیون وایي، ولسي جرګې ته د کابل لومړنیو پایلو ټولې تخنیکې چارې بشپړې شوي او هڅې روانې دې چې د نن ورځې تر وروستیو پورې اعلان شي.
ټاکنو کمېسیون د ولسي جرګې د ټاکنو په پایلو کې ځنډ د روڼتیا او په ولسمشریزو ټاکنو کې ځنډ د خلکو په خیر بولي.
ټاکنو کمېسیون له ټولو سیاسیونو غوښتنه کوي چې د دغه کمېسیون خپلواکۍ ته احترام وکړي او پرېږدي چې په خپلواکه توګه پرېکړې وکړي.
دوی وایي، سیاسیون دې بې ځای نیوکې نه کوي او د خپلو شخصي غوښتنو پوره کولو په موخه دې فشار هم نه پرې راوړي، څو دغه ملي پروسه په سمه توګه مدیریت شي.
له دې سره اجرایه ریاست هم د ولسي جرګې د ټاکنو د پایلو په اعلان کې ځنډ او د ولسمشریزو ټاکنو وروسته کېدل تخنیکي ستونزې بللي.
ټاکنو کمېسیون حکومت سره طرحه شریکه کړې چې څنګه کولی شي راتلونکې ولسمشریزې ټاکنې له درغلۍ او ځنډ پرته ترسره کړي او تیرې تیروتنې بیا تکرار نه شي.
دغه کمېسیون له حکومت او ټول اړوندو ارګانونو غواړي چې خپل مسؤلیتونه پر وخت او سمه توګه اجرا کړي، چې له امله یې د دوی په چارو کې خنډ رامنځته نه شي.
ټاکل شوې وه چې یکشنبه ناوخته د کابل لومړنۍ پاېلې اعلان شي، خو د ټاکنو کمېسیون په خبره د لا شفافیت په موخه وځنډول شوې او ښایي دغه پایلې دوشنبه ناوخته اعلان شي.
