وېسټ دا ځل سفر له انګلستان پیل کړی دی، چې متحده عرب اماراتو ته به هم سفر ولري او په دې لړ کې به د امریکا متحدنیو سره د افغانستان په تړاو بحثونه وکړي.
وېسټ ویلي، د دې سفر بحثونه به یې تر ډېره د افغانستان په تړاو له خپلو همکارانو سره په ګډو ګټو وي.
هغه زیاته کړې:« زه به روانه اوونۍ د جون له پنځمې تر نهمې له انګلستان او متحده عرب اماراتو لیدنه وکړم او هلته به له خپلو همکارانو سره د افغانستان په تړاو پر ګډو ګټو بحث ولرو.»
که څه هم د وېسټ د دې سفر ټول جزئیات په واک کې نشته، خو تحلیل کوونکي په دې باور دي، چې امریکا اوس له کابل سره د مستقیمو مذاکراتو د پیل لپاره له خپلو متحدینو سره سلا مشورې کوي.
دوی وايي، امریکا له خپلو متحدینو سره له مشورو وروسته به د افغانستان له سرپرست حکومت سره مستقیم مذاکرات پیل کړي،خو ترهغې چې د نړیوالې ټولنې غوښتنې په پام کې ونه نیول شي او افغان لوری په خپلو سیاستونو کې بدلون رانه ولي، د وېسټ سفرونه د افغانستان لپاره ګټور نه شي تمامېدلی.
د سیاسي چارو تحلیل کوونکی حبیب الرحمان شمال وايي:« که څه هم د توماس وېسټ د سفر په تړاو چې انګلستان او متحده عرب اماراتو ته یې پیل کړی، جزئیات نشته دی، خو هېله مندي شته چې د نړیوالې ټولنې او امریکايي چارواکي له مشورو وروسته د طالبانو له اوسني سرپرست حکومت سره مستقیم مذاکرات پیل کړي ، خو ترهغې چې د نړیوالې ټولنې غوښتنو ته توجه ونه شي او د اوسني حکومت په سیاستونو کې بدلون رانه شي، دا سفرونه یوازې د امریکا او د نورو هېوادونو منافع لپاره دي او د افغانستان ستونزې سره مرسته نه شي کولی.»
په ورته وخت د افغانستان سرپرست حکومت بیا د رسمي سیاسي اړیکو ټینګښت د ټولو پر ګټه بولي او اړتیا یې ګڼي خو ټینګار لري، چې اړیکې باید په متقابل درناوي ولاړي وي.
د اسلامي امارت مرستیال ویاند بلال کریمي وايي، له افغانستان سره اړیکو ته نړۍ او له نړۍ سره رسمي اړیکو ټینګښت ته افغانستان اړتیا لري، خو باید په کې د افغانستان ملي ګټې او اسلامي ارزښتونه خوندي وي.
کریمي زیاتوي:« د ډیپلوماتیکو اړیکو موضوع د ټولو لوریو پر ګټه ده،څومره چې افغانستان اړتیا لري، چې له نړۍ ډیپلوماتیک روابط ولري، د نړۍ، سیمې او ګاوندي هېوادونه هم په هماغه اندازه ګټه لري چې څومره یې افغانستان لري. اسلامي امارت له ټولې نړۍ سره د ښو اړیکو طرفدار دی،خو باید پرمتقابل درناوي ولاړې وي او د افغانستان لوړې ګټې او اسلامي ارزښتونه په کې خوندي وي.»
توماس وېسټ به په خپلو تیرو سفرونه کې چې د افغانستان په تړاو یې درلودل، په بهر کې له میشتو پخوانیو افغان سیاسیونو ، مدني او بشري حقونو فعالانو او همداراز د ښځو حقوقو له مدافیعینو سره کتل، خو دا ځل یې د سفر په اجنډا کې له افغانانو سره لېدنې شاملې نه دي.
