د وېسټ له دې څرګندونو وروسته د امریکا بهرنیو چارو وزارت د وضاحت په توګه ویلي، دا خبرې باید د مدني ټولنو استازو او نورو افغان لورو سره وشي.
د یاد وزارت ویاند ویدانټ پټېل وايي، افغانستان کې ترهګري، د ټولشموله حکومت نشتون او د ښځو حقونه نه تامین لا هم د اندېښنې وړ ټکي دي.
هغه زیاته کړې:«د مدني ټولنې له استازو او نورو افغانانو سره د طالبانو خبرې اړینې دي. د طالبانو په رسمیت پیژندل، هغوی ته مشروعیت ورکول او ملاتړ کول د هغوی پر کړنو او پریکړو پورې تړلي موضوعات دي او طالبان باید لومړی په کوردننه مشروعیت ترلاسه کړي. د طالبانو په اړه پریکړې د هغو کړنو پورې تړلي دي،چې دوی یې په کوردننه کوي. موږ به په دې تړاو له خپلو متحدینو سره اندېښنو شریک کولو ته دوام ورکړو.»
اسلامي امارت که څه هم دې خبرو ته تازه غبرګون نه دی ښودلی، خو په تېر کې یې له افغان لورو سره خبرې نفي کړې وې او استدلال دا کوي،چې زړې څېرې ناکامې او آزمایل شوې هغه دي او په هېڅ صورت له بهره د افغانانو استازیتوب نه شي کولی.
د امریکا بهرنیو چارو وزارت ویاند ویدانټ پټېل د دوحې غونډې په اړه هم ویلي،چې په هېڅ صورت د اسلامي امارت د رسمیت پیژندلو لپاره نه وه جوړه شوې.
هغه زیاتوي:« لکه څنګه چې د ملګرو ملتونو عمومي منشي ویلي، له طالبانو سره د هر ډول رسمي تعامل پر وړاندې باید هغه موضوعات حل شي،چې د افغانانو ژوند یې په کړاو کې اچولی دی،چې په هغوی کې د افغانستان دننه د ترهګرو ډلو حضور، د ټولشموله حکومت نشتون او د بشري حقونو په ځانګړې توګه د ښځو حقونو ته نه درناوی دی. نو د دوحې غونډه د طالبان په رسمیت پیژندلو په اړه نه بلکې له افغانستان خلکو سره د مرستې په موخه د یوه نړیوال ګډ دریځ رامنځته کولو په موخه وه.»
د سیاسي چارو شنونکي بیا په دې باور دي،چې اسلامي امارت باید د ستونزو د حل په موخه له هغو افغانانو سره خبرې وکړي،چې په تېرو ۲۰ کلونو کې یې لاسونه په فساد او غلاوو نه دي ککړ.
د لویدیځ لخوا په افغانستان کې د ټول شموله حکومت نشتون، ترهګرو فعالیتونه او د بشري حقونو نقض ترڅنګ د بشري ناورین خبرې داسې مهال کیږي،چې اسلامي امارت دا ټولې څرګندونې د ادعاوو تر بریده بولي او وایي چې له حقیقت لرې دي.
اسلامي امارت ویلي،د افغانستان له خاورې چاته ګواښ نه دی پېښ شوی، حکومت یې ټولشموله دی، د ښځو اړوند مسایل یې کورني موضوعات دي او بشري ناورین هم دوی ته په میراث کې پاتې دی.
