د پکتیکا ولایت ارګون ولسوالۍ کې هغه درد لا هم تازه دی چې د پاکستان پوځي رژیم د وروستي هوایي برید پرمهال په کې د کرېکټ دری ځوان لوبغاړي شهیدان شول.
د شهید شویو لوبغاړو د فاتحې او یاد په تړاو جوړو شویو مراسمو کې چې د افغانستان کرېکټ بورډ مسوولینو او ملي لوبډلې لوبغاړي رحمن الله ګربز هم په کې ګډون کړی و، د قرباني شویو کورنیو سره غمشریکي او خواخوږي وښودل شوه.
دوی د خلکو پر یووالي ټینګار وکړ او ټول افغانان یې په غم او خوښۍ کې شریک ولس وباله.
د کرېکټ ملي لوبغاړی رحمن الله ګربز وايي: « زه یوازې دا وایم چې موږ تاسو ټول، هرڅومره چې یو، د هر افغان درد، خوشالي او غم یو دی. زه همدې غم مجبور کړم چې دلته راشم.»
د افغانستان کورني کرېکټ مسوول جارعبدالرحیم زی وايي: « هغه کسان چې دلته شهیدان شول، هغوی ډېر مظلوم وو او په مظلومیت کې شهیدان شول. نه یوازې کرېکټ بلکې د هر ورزش لوبغاړي د مینې او یووالي سمبول دی.»
اخوا د شهید شویو لوبغاړو د کورنۍ غړي او د همدې مراسمو ګډونوال په ګډه له ټولو نړیوالو بنسټونو د دې پېښې د بشپړې څېړنې غوښتنه کوي.
د شهید شوي لوبغاړو د کورنۍ غړی سید عبدالغفور وايي:« پاکستان دلته ډېر وحشیانه برید وکړ. موږ له نړیوالو او د بشري حقونو له سازمانونو غواړو چې د دې برید پوښتنه وکړي پاکستان ولې عام وګړي او ورزشکاران په نښه کړل.»
د شهید شوي لوبغاړي د کورنۍ غړی میراجان وايي: « زه خپله هم په دې پېښه کې ټپي شوی یم. زه له نړۍ غواړم چې د دې پېښې څېړنه وکړي.»
د شهید شوي لوبغاړي د کورنۍ غړی ظفر وايي: « موږ عدالت غواړو، هم د افغانستان له حکومت او هم نړیوالې ټولنې د دغو شهیدانو په تړاو عدالت غواړو.»
د تېرې اکټوبر میاشتې په ۱۷مه د پکتیکا ارګون ولسوالۍ کې د پاکستان پوځي رژیم د کرېکټ پرهغو لوبغاړو هوایي بریدونه وکړل چې د لوبې له ګټلو وروسته د یوې مېلمستیا لپاره راټول شوي وو.
د دې بریدونو په پایله د درېیو تنو لوبغاړو په ګډون ۸ کسان شهیدان او د یوه لوبغاړي په ګډون لس نور ولسي وګړي ټپیان شول.
