ولسي جرګې د زیات مصرف د وضاحت لپاره د مالیې سرپرست وزیر ور غوښتی و.
ولسي جرګې د ۱۳۹۷ کال د قطعې په تړاو د مالیې سرپرست وزیر استجواب کړی و چې د مصرف شویو پیسو په اړه جرګې ته مالومات ورکړي.
له یو کود څخه بل کود د پیسو انتقال، بودجوي واحدونه او د ضافي بستونو رامنځ ته کیدل هغه عمده پوښتنې وې چې وکیلانو له ماليې وزارت درلودلې.
د مالیې سرپرست وزیر همایون قیومي وايي٬ هغه پيسې چې د جمهوري ریاست مقام په حکم مصرفه شوي بې ځای نه دي تللي او د ضرورت په وخت ورڅخه استفاده شوې.
د مالیې سرپرست وزیر همایون قیومي د وکیلانو د پوښتنو په ځواب کې وویل٬ له کودونو څخه پیسې د ضرورت په وخت کې لیږدول شوي٬ او هیڅ پیسې د اشخاصو شخصي جیبونو ته نه دي تللي.
وکیلانو د ۱۳۹۷ کال قطعیه رای اخیستنې ته وړاندې کړه خو درې ځله رایو سره بیا هم وکیلانو قناعت ونه کړ او د ۱۳۹۷ کال قطعې رای اخیستنه چهارشنبې ورځې ته پاتي شوه.
دغه راز د ۱۳۹۷ کال په قطعیه کې چې اته موارده سرغړونې شوي وې د جرګې غړو په دې شرط قناعت کړی چې سرغړوونکي به عدلي او قضایي ارګانونو ته معرفي شي، خو په ټوله کې به قطعیه چهارشنبه تایید او یا رد شي.
