د ولسي جرګې یو شمېر غړي وايي، اندېښنه لري، که د هېواد پرکچه راپورته شوي ولسي پاڅونوال مدیرت نه شي، د هېواد راتلونکي امینت ته به په لوی سرخوږي بدل شي.
دوی له حکومته غوښتنه وکړه، چې ولسي پاڅونوال دې د سیمه ییزې اردو په چوکاټ کې جذب او فعالیت دې یې قانوني کړي.
د ولسي جرګې غړی هلمند هلمند وايي:« تاسو ګورئ، دا کوم مشران چې اوس د شل کلن حکومت یا وروسته د ۶ کلن حکومت په مخالفت کې اخته دي، ټول همدې ملیشو قدرت ته رسولي دي. زموږ هغه نظامي احزاب، چې دوی اوس هم له هغې کار اخلي، لامل یې دا د نن غلطۍ، ستونزې او ناورینونه دي. »
د ولسي جرګې غړی کمال ناصر اصولي وايي:« ولسي پاڅوالو ته دا خلک مخکې نه کړئ. ولسي جرګه باید د دې خلکو مخالفت وکړي. ځکه دا هماغه خلک دي،چې زموږ هېواد ته یې ناورین راوړی دی او نه شي کولائ،هېواد له دې بحرانه راوباسي. ټول که د ولسي پاڅونوالو په نوم دي، یا د ملیشو په نوم دي، یا هر بل چې نوم چې ورکوي. دا ټول باید د دولت تشکیل ته ولاړ شي. »
په ورته وخت کې یو شمېر نور وکیلان بیا ولسي پاڅونونه ګټور او د وخت اړتېا یې بولي.
دوی وایي، خلک د خپلو ځواکونو په ملاتړ راپورته شوي او له دولت غواړي،چې امکانات ورته برابر کړي.
وکیلان وایي، حکومت دې د اردو په لیکو کې څلوېښت سلنه تشه پر سیمه ییزو پاڅونوالو ډکه کړي.
د ولسي جرګې غړی میرزا احمد ک ټوازی وايي:« نن بیا هم د ملت پر استازو غږ کوم، چې ملي قیام ته اړتیا ده، ترڅو موږ له دې ۴۲ کلنې کړغېړنې جګړې چې د پاکستان او ملاتړو له خوا یې پر موږ تپل شوې،ټول ولسونه که قیام ونه کړي، هره ورځ به وژل کېږو.»
دوی دا خبرې داسې مهال کوي، چې په وروستیو کې د هېواد ډېری ولایتونو کې ولسي پاڅونوال د افغان ځواکونو پر ملاتړ او د طالبانو پرضد وسله پورته کړې.
