د افغانستان ملي شورا یو شمېر غړي وايي، د طالبانو جګړې اصلي داعیه د امریکا د اشغال پر وړاندې جهاد و او اوس ،چې ۹۵ سلنه امریکايي ځواکونه وتلي، له دې وروسته دا جګړه هېڅ ډول توجیه نه لري او دوام یې د ګاونډیو پر ګټه دی.
دوي وايي،اوسنی جګړه واک ته د رسېدو لپاره ده،چې پایله یې د بې ګناه افغانانو وژنه او د هېواد ملي بنسټونو تخریب دی.
د ولسي جرګې غړی خالد اسد وايي:«د طالبانو د جګړې اصلي داعیه دا وه،چې امریکا راغلې، افغانستان یې اشغال کړی دی. موږ یې پر وړاندې جهاد کوو، اوس چې امریکا او د ناټو په چوکاټ کې ټول بهرني ځواکونه له افغانستانه وتلي او لاهم جګړه روانه ده، دا جنګ د واک پر سر جنګ دی او غواړي،چې د جګړې له لارې راتلونکی نظام ونیسي،خو پایله یې افغانه وژنه او د هېواد ورانول دي.»
د ملي شورا غړي په دې باوردي،چې د امریکايي ځواکونو له وتلو ورسته د جګړې شدت او دوام د ګاونډیو پر ګټه دی او دغه هېوادونه نه غواړي،چې افغانستان یو قوي او باثباته نظام ولري.
د ولسي جرګې غړی ګل رحمان همدرد وايي:« اوسنۍ جګړه د دوه موخو پر اساس روانه ده، لومړی د واک پر سر او ځینې ګاونډي هېوادونه،چې نه غواړي افغانستان ارام وي او باثباته نظام ولري او اوس،چې بهرنیان وتلي،نو جګړه د څه لپاره. هېله دا وه،چې د بهرنیو په وتلو سره به جګړه پایته ورسیږي او د افغان لوریو ترمنځ به جدي مذاکرات پیل شي،چې پایله یې سوله اوثبات وي.»
اخوا د سیاسي چارو یو شمېر شنونکي بیا پر دې اند دي،چې روانه جګړه د افغانانو ترمنځ ده او د ټولو ملي او نړیوالو قوانینو او اصولو خلاف غیر شرعي جګړه ده،چې د افغانانو تاریخي ویاړونه یې تر پوښتنې لاندې راوستي دي.
د سیاسي چارو شنونکی حکمت الله حکمت وايي:« ننۍ جګړه د ټولو ملي او بین المللي قوانینو خلاف غیر شرعي جګړه ده،چې د افغانانو اسلامي ارزښتونه او تاریخي ویاړونه یې تر پوښتنې لاندې راوستي دي.»
د ولسي جرګې ځینې غړي بیا وايي، داچې په افغانستان کې د امریکايي ځواکونو حضور صفر ته نږدې شوی او لاهم جګړې شدت پیدا کړی،له دې سره وسله وال مخالیفین هڅه کوي،چې د سولې په خبرو اترو کې لوړ موقف ولري او واک ته د رسیدو لپاره زیات امتیاز ترلاسه کړي.
د ولسي جرګې غړې شګوفه نورزۍ وايي:« طالبان غواړي،چې د جګړې شدت زیات کړي او موخه یې هم د مذاکراتو پرمیز واک ته د رسیدو لپاره برلاسي وي.»
په افغانستان کې د امریکا پر مشرۍ د ناټو په چوکاټ کې له یو سلو لس زرو زیاتو بهرنیو ځواکونو حضور درلود،چې له شل کاله جګړې وروسته بالاخره له طالبانو سره د یوې موافقې له مخې پر وتلو یې پیل وکړ،چې اوس یې یوازې پنځه سلنه پاتي اوهغه به هم په راتلونکې یوه میاشت کې له افغانستانه ووځي.
