د ولسي جرګې ځینې غړي وایي، د افغان سولې لپاره اغیزمن ګام نه دی پورته شوی .
د جرګې غړو د سولې لپاره شوي ټول حرکتونه نمایشي یاد کړل چې ګنې د شخصي ګټو لپاره ترسره شوی دي .
د جرګې استازو د افغانستان سوله د امریکا په لاس کې وبلله او پر امریکا یې غږ وکړ چې یا دې جګړه او یا دې افغانستان کې خپل حضور پای ته ورسوي.
ولسي جرګه وايي د افغان سولې په تړاو چې په هر هیواد کې غږ پورته کیږي دوی یې ملاتړ کوي خو لاتر اوسه په دغه برخه کې ریښتینی اقدام نه دی شوی .
د جرګې غړی عبدالستار درزابي وايي له افغان حکومت رانیولې تر امریکا او سیمې هیوادونو پورې چې سولې په تړاو یې څه ویلي او یا یې هم څه کړي نمایشي بڼه یې درلودلې .
خو عبیدالله بارکزي او الله ګل مجاهد روسیه په مستقیم ډول د طالبانو په ملاتړ تورنه کړه چې له امریکا سره په تقابل کې دي او قرباني یې افغانان ورکوي.
دلته د امنیتي اورګانونو د مشرانو د استیضاح په تړاو د ولسي جرګې د رییس او د هرات استازي محمد رضا خوشک ترمنځ لفظي شخړه هم وشوه چې د جرګې د رئیس له لوري له توند غبرګون سره مخ شو .
ولسي جرګې د غونډې په پای کې پریکړه وکړه چې د نا امنیو د زیاتیدو او د طالبانو د بریدونو د زیاتوالي په تړاو به د راتلونکې چهارشنبې په ورځ فوق العاده غونډې ته امنیتي مشران استجواب کړي .
